Редакторын шаяжы

Жеп кыргыжмылаок анзыкыла кыргыжеш, цакленӓт шокташ ӹш ли, кыце «Цикмӓ» журналын пӹтӓриш номержӹн лӓкмӹжӹ годшен 15 иӓт шон колтыш.

«Цикмӓн» пӹтӓриш номерӹштӹжӹ редакин шаяжы техень ылын: «Шотеш пиштӹмӹ лыдшы, кидӹштет у журналым кычет. Лӹмжӹм ужын, ӓнят ӧрӹнӓт кердӓт. Мам «Цикмӓ» кырык мары йӹлмӹштӹ анжыкта? Шонгырак эдемвлӓ, ӓнят ӓшӹндӓрӓт – тенге молнам Козьмодемьянск халам кырык марынвлӓ лӹмденӹт.

Кыце кортушка гӹц цаклышда, «Цикмӓ» культурына дӓ культура гишӓн сирӹшӹ журнал ылеш. Пӹтӓриш номерӹшкӹжӹ шукыжымок сӹлнӹшая гишӓн артикльвлӓм пыртымы, вес ин, шаненӓ, кунстын вес жанрвлӓжӹ гишӓнӓт артикльвлӓм пырташ лиэш, но тенге гӹнят журналышты кымда вӓрӹм сӹлнӹшая гишӓн шанымашвлӓ, ланзылымашвлӓ, шӹмлӹмашвлӓ йӓшнӓш тӹнгӓлӹт.  Тидӹ иктӹ.

Весӹ, Мары Элышты кырык марла «У сем» журнал лӓктеш. Вӹц иштӹ тӹдӹ ӹшкӹлӓнжӹ корнымат такыртен, ӹшке анжалтышыжат дӓ традицижӓт улы. Пӓлдӹртӹмӹ шоэш, «Цикмӓ» «У семлӓн» ӓптӹртӓш манын ак лӓк, журнал ӹшке корныжы доно кеӓш тынгӓлеш. Шанымы шоэш, ти кок журнал лошты икӹжӓк-иктӹм ынгылымаш лиэш.

«Цикмӓ» журналышты шукы вӓрӹм вес йӹлмӹвлӓ гӹц сӓрӹмӹ пӓшӓвлӓ йӓшнӓш тӹнгӓлӹт. Лыдшы ти номерӹштӹ эстон сирӹзӹвлан пӓшӓвлӓштӹ доно пӓлӹмӹ лин кердеш, финн культурышты шӱдӹ и перви махань процессвлӓ кенӹт, саамвлӓн кӹзӹтшӹ жепӹн культура дӓ йӹлмӹвлӓштӹ гишӓн лыдын кердеш. Толшаш жепӹн культурынам виӓнгдӓш лимӹ модель гишӓн сирӓлтеш. Шанымы шоэш, ти журнал мары культура доно интересуялтшы, тӹдӹн верц шытырланышы эдемӹн кидӹшкӹжӹ вӓрештеш, кыды журналыш культурына гишӓн ӹшке шанымашвлӓжӹмӓт сирен колтен кердеш. Лӹмӹнок халавлӓштӹш кырык мары культура гишӓн пӓшӓвлӓ вычымы ылыт. Журналышты у лыдышвлӓлӓнӓт, проза дӓ сӓрӹмӹ пӓшӓвлӓлӓнӓт вӓр лиэш.

Ти номерӹштӹ культурына, сӹлнӹшаяна гишӓн сирӹмӹ пӓшӓвлӓ дискусси анзыкыла нӓнгемӹ гишӓн попат. Полемика шукердӹ агыл кырык мары прессышты шачын дӓ шукы монгыран ылеш. Анжалтышвлӓм тиштӹ «цилӓн ик семӹнь шаныда» манын сирӹмӹ агыл – цилӓ эдемок ӹшке семӹньжӹ шанышашлык, тӹнӓм веле кыце культурыштат, тенгеок ӹлӹмӓштӓт махань-шон у монгырвлӓ лин кердӹт. Иктӓ -гӱ вес семӹнь шана гӹнь, тӹдӹм вырсаш, тышманеш шотлаш ак кел, тӹдӹн шанымашыжымат шотыш нӓлӓш дӓ пиштӓш тыменьмӹлӓ. Тенге ӓнят демократиӓн ушемкымдемӹштӓт ӹлӓш тыменьӹна дӓ икӹжӓк-иктӹнӓм шотеш пиштен, ынгылен веле мӓ культурынам анзыкыла виӓнгден кердӹна. Кӹзӹт ынгыленӓ, халыкланна ма пуйырен, тӹдӹ мӓмнӓн кидӹштӹнӓ ылеш, йӹлмӹнӓм дӓ культурынам виӓнгдӓш манын, кӹзӹт у корнывлӓ дон йӧнвлӓ лактӹн миӓт, халыкна ӹшке инициативым лыктын моштышашлык, кӱшӹцӹн иктӓ -гӱ ӓнят толеш, вӓрешнӓ ӹштен пуа – тидӹм вычен шӹнзӹмӓш сойток нима лӓктӹшӹм ак канды. Ӹнянӹмӹ шоэш – кӹзӹтшӹ ӹрвезӹ эдемвлӓ инициативныйрак лит дӓ йӹлмӹнӓ дон культурынам анзыкыла виӓнгдӓш тӹнгӓлӹт. Кыце келесӹмӹ ли, халыкнан толшаш жепшӹ ӹшке кидӹштӹнӓ, но Руш Федераци кӧргӹштӹ ылын, мӓ тӹштӹ лин мыштышашлык ылына, вес халыквлӓм шотеш пиштенӓ гӹнь, нӹнӓт мӓмнӓм шотеш пиштӹштӹ, молнамшыла ӹшкӹмӹштӹм когоэш шотлен, вӹкӹнӓ ӹнжӹштӹ анжеп. Руш Федераци ӹшке гӹцӹнжӹ анзыкыла кешӹм, виӓнгшӹм, кӱшӹл культуран сӓндӓлӹкӹм ӹштӹнежӹ гӹнь, тӹдӹ кӧргӹштӹш изи халыквлӓн тымдымаш дон культурым виӓнгдӹмӓш гишӓнӓт мондышалык агыл.

Реклама