“Шӧртньӹ тылип” шачын

Н.ИГНАТЬЕВ лӹмӓн библиотекӹн краеведени отделыштыжы сӹлнӹшаям яратышывлӓ, сирӹзӹвлӓ “Шӧртньӹ тылип” клублан негӹцӹм эртӹшӹ вӓшлимӓшӹштӹ доно пиштевӹ. Отделын шытыр вуйлатышыжы Любовь Андреевна Митрюшкина стӧлӹм погыш, чӓйӹм йӱэвӹ, Крещенья лӹм доно кол кагыльымат погынышывлӓ качкылдалевӹ.
Варажы туан йӹлмӹн, сӹлнӹшаян «нырыштышы» тыргыжландарышы ядмашвлӓм вӹкӹ лыктын миэвӹ. Погынышывлӓ шукердшенок иквӓреш ылделытат, шая шукы лӓктӹ.
Пайскырык вел поэт Софроний Семенович Гайдов тыргыжлана: “Сирӹшӹвлӓ лошты сӓмӹрӹквлӓн “шылдыр” ак кай. Тыменьшӹвлӓм сӹлнӹшая, туан йӹлмӹ докы кымылангдаш школвлӓшкӹ вӓшкӹмӹлӓ, тӹштӹ вӓшлимӓшвлӓм эртӓрӹмӹлӓ“.
Шур вел поэт Анатолий Александрович Атюлов сӹлнӹшаяштышы ӹшке церотан ашкылвлӓжӹ гишӓн келесӓльӹ. Мары книгӓ издательствеш лыдышвлӓжӹн у сборникым «пецӓтлен лыкмы церотым вычаш» коден. “Кӱшӹл кымдемвлӓшкӹ“ – шанен пиштӹмӹ лӹмжӹ.
Анатолий Александровичӹн у лыдышвлӓжӹ доно “Жерӓ“ дӓ “Йӓмдӹ ли” газетвлӓ ти лошты пӓлӹмӹм ӹштӓт. Лыдышвлӓштӹ пӧрттӱ доно тӓнгӓштӓрӹмӓш чиӓвлӓ тӹргач, манмыла, лачокшы сӹлнӹшаян шӱлӹшӹжӹ техеньӹ ылеш. А.Атюловым мӓмнӓн кырык марын Есениннӓ манаш лиэш. Тӹдӹ шанымашвлӓжӹм нӹжгӓн пачын пуэн кердеш, дӓ йӓнг, лачокат, мулӓндӹ вӹлец кушкӹрӓк анжен-кайын пӧртӹл куза.
Кым книгӓн авторжы Мария Алексеевна Илдушкина у керӓл проектӹм тагачшы кечеш анзыкыла пыт шӹкӓ. Ти корнышты пӱлӓ эртӹмӹ: кырык мары национальный дӓ первиш годшы чимӓшӹм вочыгач гӹц тӹнгӓлӹн мӹжӓр якте, йыдал гӹц пакилкӓ якте мактымы, первишӹ ӹлӹмӓшӹм кымдан пачмы. Руш сирӹзӹ Лилия Белякова-Кручинина лыдышвлӓм кымылын сӓрен, ӹшке стильжӹн тот донат сӹлнӹшаям цеверемден. Книгӓм лыкташ Кырык мары администраци палшен шокта гӹньӹ, халыкланна кымылангдышы, курымвлӓ мычкы ванжышашлык пӹрня (подарка) лиэш. Яжо пумагам, иллюстрацивлӓм кычылташ сӧрӓт. Ти книгӓ гӹц у лыдышвлӓӓт йонгалтевӹ.
Кырык мары бардна Владимир Юшкинӓт пиш кымылангдышы, суксывлӓн ӹлӹмӹ вӓрӹшкок вуйта вӹстӓрӹшӹ мырым йонгалтарыш. “Тидӹм кымшы гӓнӓ тӓ лоштыда мырем, семнялӓнем веле эче мыренӓм” — автор манындальы. Шӱм тыргыжым тӓрвӓтӹшӹ шамаквлӓжӹ ӓшеш дӓ йӓнгеш вазевӹ:
«Ирок кӹцкем ош тӓлгӱдӹм
Шӹнзӓм ладнан араваш
Дӓ кыдалам курым поктен
Эртен кешӹ ивлӓ гач…»
Цилӓн ти шергӓкӓн пӹрнялӓн таум келесӹшнӓ.
Погынымашын йогыжы ладнан пӓшӓ кынештӓрӹмӹ ядмашвлӓшкӹ ванжыш. Клубын виктержӹм айырышна, кышкы Владимир Юшкин, Любовь Митрюшкина, ти шамак корнывлӓн авторжы айырымы лиэвӹ.
Клубышкы сӹлнӹшаям яратышывлӓм шӱмӹн ӱжӹнӓ. Погынымашвлӓм кок тӹлзӹ вуй гӹц эртӓрӓш линӓ. Нӹнӹвлӓ лошты планыштышы пӓшӓвлӓм клуб эртӓрӓ. Вӓшлимӓшвлӓн протокол 30-шы ивлӓ годшы овуца семӹнь кырык марла видӓлтеш.

Е. САВЕЛЬЕВА,
“Шӧртньӹ тылип” клубын координаторжы.

a href=»https://tsikma.files.wordpress.com/2011/01/kylvaja.jpg»>

Запись опубликована в рубрике Uncategorized. Добавьте в закладки постоянную ссылку.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s