Культура шотышты кышты мӓ ылына?

Культура шотышты кышты мӓ ылына?

Халыкнан культура гишӓн чӹдӹ агыл сирӹмӹ пӓшӓ улы. Ти пӓшӓвлӓштӹ шӹренжок фольклорым веле анжымы ӓль нӹнӹ фольклор докы лишӹл ылыт, тӹштӹ халыкнан эртӹш жепшӹ гишӓн шукы сирӓлтеш, тенге гӹнят мӓ кӹзӹтшӹ дӓ толшаш жеп доно ӹлӹшӓшлык ылына. Толшашышты кырык мары культура махань лин кердеш? Ти ядмаш мӓмнӓм интересуя.
Ирвел Европышты ӹлен дӓ формируялтын, халыкланна махань культура лишӹл ылеш? Европа культура ӓль Азин культура? (Шергӓкӓн лыдшы, ти ядмаш руш культурыштат актуальнеш шотлалтеш. Руш культурышты тидӹ гишӓн ХIХ-шӹ курымын попаш тӹнгӓлмӹ дӓ кӹзӹтӓт цӓрнӹмӹ агыл.) Ӓнят мӓ ӹшке йӹрнӓ пӹсмӓнӹм шагалтеннӓ дӓ лач пӓлдӹртӹмӹ йӹргецӹштӹ веле культурынам виӓнгдӓш цаценӓ? Йӓл культурывлӓм шотыш нӓлде. Нӓлӹнӓ гӹнь, ӓнят тӹнӓм лач ик халыкын культурыжым веле образец семӹнь анженӓ — руш халыкын культурым? Техень ылмаш, шукышты агыл кризисӹш канден шагалтен кердеш. Культура со контактвлӓштӹ лишӓшлык, тӹдӹ вес культурывлӓштӹ ма у улы, тӹдӹм со йижден шалгышашлык. Культура нигынамат статикьштӹ агыл, ик вӓрӹштӹ ак шалгы, тӹдӹ динамикӹштӹ ылеш, со вашталт миӓ дӓ у формывлӓм нӓлӹн, анзыкыла виӓнгеш. Ак виӓнг гӹньӹ, ӹлӹмӓшӹштӹ у формывлӓ тӹшкӹ ак пыреп гӹньӹ, тӹдӹ шагалеш дӓ колышы культура гишӓн веле тӹнӓм попаш лиэш.
Цаклалтеш, кынамжы культурынам виӓнгдӓш, у корнывлӓ доно колташ манын, шеклӓненӓ дӓ лӱдӹнӓ вӓк. Концертвлӓ моло шӹренжок мары тыгыр гӹц пасна ак эртеп, тидӹ постоянный атрибут лишӓшлык, шаненӓ. Тошты тардици доно сирӹмӹ мыры дӓ лыдышвлӓ докы тымень шӹнзӹннӓ. Иктӓ-ма у лиэш гӹньӹ, ӧрӹн, сӹнзӓхалым лӱктӓл анженӓ дӓ тидӹ мӓмнӓн агыл, манын кердӹнӓ. Примереш «Жерӓ» газет гӹц ик комментарим нӓлмӹ шоэш. Авторжым ӓм ӓшӹндӓрӹ, но тӹштӹ кырык мары музыка, тӧрӹнжок рок-н-рол гишӓн шая кеӓ. Ти шанымашын авторжы «кырык марла рок-н- ролжы моло келеш вӓл?» манын ядеш. Шанымем доно тӹдӹн ядмашыжы интересный ылеш- техень анжалтышан кырык марын вет шукы улы. Улы техень эдемвлӓӓт кыдывлӓ малын кырык мары йӹлмӹм тыменяшӹжӹ келеш, малын книгӓвлӓм лыкташ келеш, малын сӹлнӹшая пӓшӓвлӓ келӹт, малын, вообще, кырык марла попаш келеш?-ядын кердӹт. Техень анжалтышым пиш серьезныеш дӓ лӱдӹшлӓэш (опасныеш) шотлымыла.
Кӹзӹт якте мӓмнӓн шукынжок кырык марла мам мыраш, мам сирӓш, мам попаш лиэш тидӹлӓн официальный агыл тамахань канонвлӓм лыктынна. Тидӹм ӹштӓш ак ли, тидӹм ӹштӓш лиэш, тенге сирӓш лиэш, а тенге ак ли — техень принцип доно культурына дӓ йӹлмӹнӓ вӹкӹ анженӓ гӹньӹ, тӹнӓм туан йӹлмӹнӓжӹм шотеш пиштӹмӹлӓ ана чуч, тӹдӹлӓн мӓ ӹшке вуйта прамой шӱлӓш ирӹкӹм ана пу.
Ӹнде культура докы пӧртӹлӹнӓ. Культуры шамакыш пиш шукы ынгылымаш пырӓ ӹлӹмӓш овуца, техникӹн виӓнгмӹжӹ, философи, политика, культура культура семӹнь дӓ молат.
Ӹлӹмӓш овуцаат культура ылеш. Шӹренжок ӹлӹмӓш овуцам культура доно анат кӹлдӹ. Ӹлӹмӓш- ӹлӹмӓш ылеш, а культура- культура, манын кердӹнӓ. Ти шотышты ӓнят мӓмнӓн шамыштына совет годшаш стереотипне шанымаш кодын: культура лач тӹдӹ, мам синтезируйымы. ма кӱшӹл дӓ профессиональне культура ылеш. А кечӹйӹдешӹ ӹлӹмӓшнӓ. кыце качкына. йӱнӓ. попенӓ. пӓшӓм ӹштенӓ. махань туалетвлӓш каштына, хыналаш кенӓ. пӧртвлӓнӓм чангенӓ. садвлӓнӓм олмыктаренӓ, эдемӹм остатка корныш ыжатенӓ- тидӹм культура доно ана кӹлдӹ. Цилӓ тидӹ ӹлӹмӓш веле, манын кердӹнӓ. Но тидӹ и ылеш культура, кыды кӱшӹл культурылан негӹцӹм пуа.

Культура культура семӹнь. Сола дӓ хала культура

Кӹзӹт якте, манаш лиэш, кыце кырык тенгеок алык мары культурат солашты веле виӓнгӹнӹт. Мары Элышты цилӓ культура институт дӓ учреждени: театр, филармони, культура министерство, культура колледжвлӓ, кӱшӹл школвлӓ халашты ылыт гӹнят, мары культура тӹштӹ важым колтен кердде. Мары йӹлмӹвлӓлӓн халашты 1990-шы ивлӓ якте шӱлӓш дӓ ӹлӓш кӓньӹсӹр ылын, нӹнӹ престижныйвлӓ ылделыт, нӹнӹлӓн халавлӓштӹнӓ рокым йӓмдӹлӹмӹ агыл дӓ ӓнят кӹзӹтӓт йӓмдӹлӹмӹ процессӹштӹ веле ылына. Тӧр лиӓш гӹньӹ, тидӹлӓн ик ӓмӓлжӹм марынвлӓн шӱм кӧргӹштӹ мон кердӹнӓ: халаш ӹлӓш, тыменяш, пӓшӓлӓш ванжен, мӓ йӹлерӓк йӹлмӹнӓжӹм кодаш цаценнӓ, ӹшкӹмнӓм коктеш шелӹннӓ. Ылыннажы марын, но культурынам, йӹлмӹнӓм мондаш йӓмдӹвлӓ, халыкнан важвлӓм кошташ палшышывлӓ. Кӹзӹт Марий Элын халавлӓштӹ маняр тӹжемӹн техень марынвлӓ ылыт? Кӱ пӓлӓ? Ӓнят нӹнӹ ӧрдӹжӹштӹ шалген, кӹзӹт йӹлмӹнӓм кымдаракын кычылташ цацымына доно солидарный ылыт. Но лин кердеш мӹнгешӓт. Нӹнӹ, яжон тымден лыкмывлӓ, яжо поствлӓштӹ ылшывлӓ, туан йӹлмӹнӓ доно попышывлӓ агылвлӓэт, мӓмнӓн цацымашвлӓлӓннӓ тореш пашкарвлӓм веле шӹнден кердӹт. Тенге гӹньӹ культурым халавлӓштӓт важвлӓм колтымы верц ылшы эдемвлӓлӓн шокшым кӓргӓлтен, пӓшӓм ӹштӓш вӓрештеш.
Ӹнде сола культурын тӹнг пӓлӹквлӓжӹм пӓлдӹртӹмӹ шоэш. Сола культурышты раскыдын фольклор элементвлӓ кайыт. Шамак толшеш, сола культура кӱпалатышты ӓль культура пӧртьштьш концертвлӓм анжалаш гӹньӹ, ти элементвлӓм стилизуйуымаш (тидӹ шӹренок халык куштымашты, мырымашты, музыкым шактымашты) цаклалтеш. Театрвлӓн репертуарымат анжалмыкы, сола ӹлӹмӓш гишӓн шайыштшы спектакльвлӓм веле тӹштӹ шӹренжок шӹндӓт – цаклет. Сӹлнӹшаяштынаат сола тематика доминируя. Сола культура мӓмнӓн халыкнам кымдан ӓвӓлтен, но тенге гӹнят сола, аграрный культуран халык мӓ со лин ана керд. Ӹшкӹмнӓм халык семӹнь ӹшӹклен, цымырен кодыненӓ гӹньӹ, культурынам махань-шон тӹрлӹ корнывлӓ доно виӓнгдӹмӹлӓ, тӹдӹм модернизируяш, тӹдӹлӓн махань-шон у формывлӓм пуаш, тӹшкӹ свезӓ мардежвлӓм пырташ, тӹдӹм йонгатаэмдӓш келнежӹ — тенге, кыце шошым толмыкы мӓ окнявлӓм пачын, тел паштекшӹ пӹцкӓтӓ шӱлӹшӓн пӧртвлӓнӓм йонгатаэмденӓ.

Хала культура рушангдаш палша?

Тӧрӹм келесӓш гӹньӹ, шукердӹ агыл тенгеок и ылын. Но, шанем, ситуаци ӹнде вашталташ тӹнгӓлӹн: марынвлӓ ӹлен-толын, халавлӓштӓт кыце туан йӹлмӹнӓм, тенгеок культурынамат шотеш пиштӓш тыменьӹннӓ. Тидӹжӹ мӓ ӹшкӹмнӓмӓт шотеш пиштӹмӹм анжыкта. Но цилӓ годым ма тенге? Примерӹм когорак солавлӓ гӹц кандымы шоэш: Йоласал, Виловат, Кулаковы, Озерка, Арде- махань йӹлмӹм тӹштӹ шӹренок кычылтыт, махань йӹлмӹлӓ попат?
Ӹнде Цикмӓ гишӓн сирӓлтӹмӹ шоэш. Малын Цикмӓ шамак йӹлмӹшкӹнӓ пыраш тӹнгӓлӹн? Пӓлӹдӹмӹвлӓлӓн ӓшӹндӓрӓлмӹ шоэш. Цикмӓ- тидӹ Козьмодемьянск халанан марла лӹмжӹ. Вара вес ядмаш: ти лӹмжӹм марла попаш, сирӓш келеш ма? Тиштӹ келеш ӓль ак кел, техень согоньым пуаш нелӹ. Тидӹ мӓмнӓн шӱмӹштӹнӓ лишӓшлык, попыненӓ гӹньӹ попенӓ, сиренӓ — тидӹм иктӓт цӓрен ак керд, ана гӹнь- ана. Кынам халавлӓ ӓль солавлӓ кок лӹмӹм намалыт, техень ситуаци шукы сӓндӓлӹкӹшток вӓшлиӓлтеш. Примерӹм Финлянди гӹц кандем. Суоми сӓндӓлӹкӹн сек пӹтӓриш вуйхалажын лӹмжӹ финнлӓ Турку маналтеш, шведлӓ- Обу. Кӹзӹтшӹ вуйхалаат кок лӹмӓн: Хельсинки дӓ Хельсингфорс. Ти кок лӹмӹм кӹзӹтӓт активно кычылтыт, пӹтӓришӹжӹм финнлӓ, весӹжӹм шведлӓ попышывлӓ. Кок лӹмӓн халавлӓ Суомиштӹ чӹдӹн агылеп. Ӹнде эче пашкуды Суасламарым анжалына, нӹнӹнӓт вуйхалашты кок лӹмӓн: Шупашкар дӓ Чебоксары. Укаринын вуйхалажы украинлӓ — Київ, рушла Киев лиэш. Шанымем доно Цикмӓ лӹм пиш яжо лӹм дӓ мӓ такеш тӹдӹм йӹлмӹштӹнӓ активно ана кычылт. Кыце пӓленӓ, марынвлӓ Башкириштӓт аран-аран ӹлӓт, тӹштӹ Мишкан районым изи Марий Эл лӹм доно лӹмденӹт дӓ тӹ солавлӓштӹ, кышты марынвлӓ ӹлӓт, учрежденивлӓн хангавлӓ пӹтӓри марла сирӹмӹ ылыт, сола лӹмвлӓм пӹтӓри марла, вара рушла- тенге Кырык дӓ Кожла сирӹштӓт лишӓшлык агыл ма? Шергӓкӓн кырык марынвлӓ, тидӹжӹм ӹшке ана ӹштӹ гӹньӹ, мӓ докына иктӓт вӓрешнӓ ӹштӓш ак тол. Мӓжӹ вуйта тӓгӱн толмым дӓ ӹштен пумым выченӓ.

Цикмӓштӹнӓ кыце кырык мары йӹлмӹ дон культура шӱлӓт?

Ти ядмаш когонок актуальный. Ти халан ӹлӹзӹвлӓн шотым процентуально анжалаш гӹньӹ, тӹштӹ Мары Элын халавлӓ логӹц сек шукы марын ӹлӓ. Ядмаш: Цикмӓ мары шӱлӹшӓн ӓль агыл. Тӹштӹ мары йӹлмӹ дон культуры виӓн позицим нӓлӹнӹт ӓль уке? Вӓшештӹмӓш виш кодеш. Ти ядмашеш шӹмлӹмӓш пӓшӓвлӓм ӹштӓш келеш, но визуально хала ӧлицӓм анжалаш гӹньӹ, тӹштӹ марла попышым шукым колаш лиэш, но рекламывлӓ, лапка, бар, кафе, киоск лӹмвлӓ, пиш ӹжӓл, марла сирӹмӹ агылеп. Ӓнят кок-кым лӹмӹм ужаш лиэш, шукыжымок агыл.
Цикмӓштӹ кок культура ӹнде туран вӓшлит: кырык марын дӓ рушын. Кырык мары культурынажы тӹшкӹ 30-шы ивлӓн руж ташкал пырен ылын, но варажы тӹдӹм тӹшец поктен лыкмы. Тидӹлӓн махань-шон вирвлӓ ылыныт: сек тӹнгжӹ- Сталинӹн репрессивлӓ, вара мары йӹлмӹ ак кел йӹлмӹ «мырывлӓ». Да пиш трагично, ти мырывлӓжӹлӓн мӓ ӹняненнӓ дӓ варажы ӹшкежӓт тенгеок мыраш тӹнгӓлӹннӓ. Ӹнде туан культурына Цикмӓштӹ у хына гань, дӓ шижӓлтеш, когонжок вычымы агыл. Но тӹдӹ ӹнде ӹшкежӹ гӹц ак шеклӓнӹ, тӹдӹ вуйта ӹшкӹлӓнжӹ ӓкӹм пӓлӹшӹ бриллиант ылеш, кыдын ӓкшӹм мӓ ӹшкежӓт эче ана пӓлӹ, тӹдӹм ынгыленжӓт эче ана керд. Но тӹдӹм ынгылаш цаценӓ гӹньӹ, тӹдӹ ӹшке цевер сӹнжӹм мӓлӓннӓ анжыктен кердеш. Ӓнят тӹдӹ шеклӓнӓлӹн веле ӹшке гишӓнжӹ пӓлдӹртӓ, тенге, кыце сӓмӹрӹк ӹдӹр пӹтӓриш гӓнӓ иктӓ- махань цивилизованный обществыш лӓктеш.
Халаштат культурына кымдан шӓрлен кежӹ манын, тидӹлӓн мам ӹштӓш лиэш? Пӹтӓриок пӓлдӹртӹмӹ шоэш, толшаш культурым ӹрвезӹ эдемвлӓн кидӹштӹ ылеш. Кырык мары дон Цикмӓм маханьым нӹнӹ ӹштӹнештӹ, ма доно нӹнӹ кӹзӹт интересуялтыт, тӱнымбакы махань анжалтышан нӹнӹ ылыт, махань ӓквлӓм нӹнӹвлӓлӓн мораль дон халык ядмашышты пуэнӓ, махань шулыкан нӹнӹ ылыт- цилӓ тидӹ толшашышты тӹгӹрӹштӹшлӓ кайын колта лиэш. Ӹнянӹмӹ шоэш, мӓмнӓн кырык мары ӹрвезӹ эдемвлӓнӓ тӱнымбакы кымда анжалтышан, ум пӓлӓш цацышывлӓ, ӹшке мнеништӹм келесен мыштышывлӓ, анализируйышывлӓ, ӹлӹмӓш ядмашвлӓм ынгылен мыштышывлӓ, халык ядмашышты активныйвлӓ, вескид культурывлӓм пӓлӓш цацышывлӓ, вескид йӹлмӹвлӓ доно попен мыштышывлӓ, культурышкына у мардежвлӓм пырташ цацышывлӓ, экспериментвлӓм ӹштӹлшӹвлӓ, икӹжӓк-иктӹштӹм шотеш пиштӹшӹвлӓ лит.
Эче ик ядмаш: рушынвлӓ марынвлӓ гишӓн шӹренжок тамамат худам попен кердӹт, но мӓжӹ тидӹм ана ӹштӹ. Нӹнӹ семӹнь, марынвлӓ со негативный ылыт, а ӹшке анжалтышышты со вуйта тӧр ылеш. Шанем, марынвлӓ воксеокат тырхаш лидӹмӹ ородывлӓ ана ыл. Дӓ мажы интересно, Марий Эл гӹц ӧрдӹжӹштӹ марынвлӓ кого фирмывлӓ дон университетвлӓштӹш кафедрӹвлӓмӓт вуйлатен кердӹт, а ышке республикӹштӹнӓ тидӹлӓн йӧнӹм ак пуэп. Рушынвлӓ ӹшкежӓт марынвлӓ вӹкӹ анжалтышыштым вашталтышашлык ылыт дӓ кок халык лошты конструктивный хытырымашвлӓ кешӓшлык ылыт. Кӹзӹтшӹ гань «мӓ тӓ гӹцӹндӓ яжорак ылына» анжалтыш доно агыл.

Мӓ географи шотышты вадывелнӹрӓк ӹленнӓ ылгецӹ?

Тӹнӓм марынвлӓн истори, культура виӓнгмӓш, йӹлмӹ политика дӓ ӓнят кугижӓнӹш структурынаат воксеокат вес йиш лиэш ылын? Ӓнят тӹнӓм мӓмнӓн пашкудывлӓнӓ Эстони, Латви лит ылын? Ӓнят тӹнӓм мӓмнӓн цаткыды идентитетнӓ лиэш ылын дӓ ӹшкӹмнӓм таманяр гӓнӓ шукырак шотеш пиштенӓ ылын. Историн арававлӓжӹ вес семӹньрӓк кенӹт ылгецӹ? Руш халыкын характержӹ вес семӹньрӓк ылын ылгецӹ. Россий ӹшке кӧргӹштӹш халыквлӓжӹм шотеш пиштӓ ылгецӹ. Кӹтӹкӹн Цикмӓштӹш тӹ эдемвлӓ гишӓн, кыдывлӓ мары йӹлмӹм шӓрӓш ирӹкӹм ак пуэп. Лӹмӹнжок ӓнят тидӹ рушынвлӓм тӹкӓлеш. Сирӹмӹ пӓшӓштем тӹнг вӓржӹм марынвлӓ гишӓн шая кеӓ, но кынам марынвлӓ рушынвлӓ доно иквӓреш ӹленӓ, тӹнӓм ти халык гишӓнӓт сирӓлтӓш лиэш. (Молнамжы руш этнографвлӓ марынвлӓ гишӓн мавлӓм моло сиренӹт, шанем, лыдшы тидӹм пӓлӓ). Пиш ӹжӓл, марынвлӓн мӱлӓндӹвлӓш толмы жеп годшен, ти халык ӹшкӹмжӹм хозаэш шотлен дӓ техень анжалтыш кӹзӹтӓт эче ямде.
Марий Элыштыш рушынвлӓ ӓнят кӹзӹт якте кымда Российӹн дӓ руш халыкын интересшӹм ӹшӹклӓт, шанат, дӓ мары йӹлмӹвлӓлӓн прамой виӓнгӓш волям пумышты ак шо. Но кӹзӹтшӹ жеп цивилизаци жеп дӓ техень анжалтышвлӓ пиш когон самыньвлӓ ылыт. Тиштӹ мӓ ышан лишӓшлык ылына дӓ рушынвлӓ йӹлмӹнӓм халашкы пыртымышты ак шо гӹнят, тӹш пыртымы йӧнвлӓм мон мыштышашлык ылына, законвлӓм кычылт тидӹм ӹштӹмӓн.
Техникӹн виӓнгмӹжӹ культуреш пиш келгӹ кишӓвлӓм кода, тӹдӹ ӹлӹмӓшӹм куштылта. Шӱдӹ иштӹ марынвлӓ Европыштыш шукы вес халыквлӓ ганьок шагавуй гӹц тракторыш ванженнӓ, телефоным, компьютервлӓм, факсвлӓм, шукы йиш электрон техникӹм кычылтына. Цилӓ тидӹ ӹлӹмӓш овуцанам. ӹлӹмӓш культурынам вашталтен. Но тенге гӹнят, Вадывел Европыштыш халыквлӓ доно тӓнгӓштӓрен, марынвлӓ техникӹм кычылтмашты пиш шайылан кодынна, лӹмӹнок бытовой техника шотышты. Вадывел Европышты цилӓ пӧртӹшток телефон, компьютер, шукы пӧртӹшток электрон почта, факс, машинӓвлӓ улы. Кыце солавлӓштӹ, тенгеок халавлӓштӓт пӧртӹштӹ туалет дон душ, яжон планируйымы кухня…

Экологи ядмаш гишӓн

Экологи ӹлӹмӓшӹн тӹнг ядмашеш шотлалтеш дӓ ӹлӹмӹ вӓрвлӓм олмыктарымаш, итӹрӓштӹ урдымаш тӹштӹ сӹнзӓшкӹ тӧрӧк керӹлтӹт. Кырык марышты махань экоядмашвлӓ актуальный ылыт? Тиштӹ кым тӹнг ядмашым пӓлдӹртӓш лиэш: а). Йыл. b). Нырвлӓштӹ кычылтмы удобренивлӓ. с). Солавлӓштӹ сӱк вӓрвлӓ дӓ туалетвлӓ.
Философи ынгылаш лимӹ йӹлмӹ доно ынгылдараш гӹньӹ, эдем дон эдем, эдем дӓ ушемкымдем лоштыш кӹлвлӓм анжыкта. Ти шотышты кужы жеп мӓмнӓн тӹнг философинӓ марксизм-ленинизм философи ылын. Кӹзӹт мӓмнӓн ушемкымдемӹштӹнӓ марксизм дон ленинизм тӹнг вӓрӹм ак йӓшнеп, марынвлӓ нӹнӹ гӹц ытлалтынна ӓль ытлалтмы процессӹштӹ ылына. Марий Элӹштӹ ӹнде ирӹкӓн капитализм шӓрлен кен. Дӓ пиш ӹжӓл, кыце республикыштына, тенгеок цилӓ Россий мычкы капитализмӹн сек худа формывлӓжӹ веле вӓрӹм моныт: эдемлӓн нимахань ӓк уке, шукынжок ӹшке гишӓнӹштӹ веле шанат, кугижӓнӹш ӹшке гражданвлӓжӹ гишӓн сек минимально тыргыжлана, нӹнӹм ак ӹшӹклӹ, но армиш дӓ вырсы операциш нӓлӓш ак монды.
Российӹштӹш дӓ Марий Элыштыш капитализм Вадывел Европыштыш капитализм гӹцӹн пиш когон айыртемӓлтеш. Европышты пӹтӓриок эдем ӓклӓлтеш, тӹдӹн личностьым шотыш цилӓ вӓре нӓлӹт, лапка гӹцӹн тӹнгӓлӹн, сӓндӓлӹквлӓн парламентвлӓ якте. Европышты законвлӓм моло лыктыт гӹньӹ, нӹнӹм шотеш пиштӓт дӓ ӹлӹмӓшӹштӹ кычылтыт. Кӹзӹтшӹ ситуацим анжалаш гӹньӹ, кыце Российӹштӹ, тенгеок Марий Элышты законвлӓм цивилизованный сӓндӓлӹквлӓштӹ ганьок лыктыт, но нӹнӹм ӹлӹмӓшӹштӹ кычылтмаш ак цаклалт. Тидӹ гишӓн Марий Элын йӹлмӹ законвлӓӓт попат, нӹнӹм сирӹмӹ, а содыки кӹзӹт якте мары йӹлмӹвлӓн статусым лӱктӓлмӹ агыл, а республикӹн президентшӹ марла попен мыштымы закон гишӓн воксеокат мондымы. Но вес семӹнь анжалаш гӹньӹ, ти законвлӓ пиш демократи шӱлӹшӓн ылыт. Марий Эл дӓ Россий демократиӓн ушемкымдемӹм чангынештӹ гӹньӹ законвлӓштӹмат шотеш пиштӹшӓшлык агылеп ма?

(Пакыла лиэш)

Запись опубликована в рубрике Uncategorized. Добавьте в закладки постоянную ссылку.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s