Пӓлӹдӹмӹ, но лишӹл

Елизавета Егоркина

Пьеса

МАДШЫВЛӒ:

Майкл – Америкӹштӹ ӹлӹшӹ коклы вӹц иӓш бизнесмен
Полина – сӓмӹрӹк врач
Марина – Полинан йӹгӹр пелӓшӹжӹ, мырызы
Костя – лушы классышты тыменьшӹ
Людмила – Костян ӓвӓжӹ, нӹллӹ вӹц иӓш ӹдӹрӓмӓш
Антон – ӹндекшӹмшӹ классышты тыменьшӹ, Костян тӓнгжӹ
Дима – кымлы вӹц иӓш пӓшӓдӹмӹ пӱэргӹ
Петр – коклы шӹм иӓш пӓшӓдӹмӹ пӱэргӹ
Алина – журналист

ИКШӸ КӸДЕЖ

Икшӹ картин

Шӹжӹ. Халаштышы ӧлицӓ мычкы кок пӱэргӹ ашкедеш. Нӹнӹ «Школа» манын сирӹмӓн здани докыла лишемӹт.

П е т р (сигаретшӹм пижӹктӹмӹ лошты сагажы ашкедшӹ пӱэргӹ докыла вуйжым сӓрӓлӹн). Дима, ӓнят, мӓлӓннӓ когылянна лучи пӓшӓм кӹчӓл анжаш?
Д и м а. Тӹнь ма, пӓшӓм ӹштӓш мӹньӹн кымылем уке. Такеш ма, шанет, тӹньӹм ти кечӹвлӓ лошты компьютервлӓм шолышташ ӱжӹн кешӹм. Нӹнӹ палшымы доно окса ӹшкеок кӹшӓнӹшкӹнӓ толаш тӹнгӓлеш, цилӓ шот доно веле организуен мышташ келеш.
П е т р (тыргыжланенрӓк). Эчеӓт питӹрӹмӓшкӹ вӓрешт кердӹнӓ вет?
Д и м а. Лӱдшӹ моренок ылатыш. Тӹнӓм мӓ вет весӹ гишӓн вӓрештӹннӓ ыльы, а кӹзӹт совсемок у пӓшӓм тӹнгӓлӹнӓ. Кыце маншаш, мӓ скамервлӓ линӓ, Интернет палшымы доно кӹшӓннӓм аварташ тӹнгӓлӹнӓ. Ит тыргыжланы, ти пӓшӓм йойынрак виктӓрен колтенӓ, седӹндон ик полицейскийӹнӓт нер ӱпшӹжӹ ак шиж лиэш.
П е т р. Ӓнят-ӓнят? Тӹньжӹн теве образованиэтӓт улы, компьютержӹмӓт яжон пӓлет, а мӹнь ма, тӹдӹн лишкӹжӓт иктӓ кок-кым гӓнӓ веле мадаш шӹнзӹн анженӓм.
Д и м а (тӓнгжӹн пулышыжым вургымла кидшӹ доно севӓлӹн). Ит ойхыры, тӹлӓт компьютер доно пӓшӓм ӹштӓш ак вӓрешт, теве цецаш мӓ ти школышты тыменьшӹ Костя дон Антоным ӓренӓ. Нӹнӹ гишӓн цилӓ пӓлен нӓлӹнӓм: компьютер доно тагынамшен ровотаят, англ йӹлмӹмӓт худан агыл пӓлӓт.
П е т р. Ак келшеп гӹньӹ?
Д и м а. Келшӹмӹштӹм кӱ ядеш? Мӓ нӹнӹм кидӹш пингӹдӹн пӹтӹрӓлӹнӓ.

Коктын школ туре шагалыт. Тидӹн годым уроквлӓ пӹтӹмӹм амаса пачылтмы юк дӓ тӹшецӹн сумка кидӓн тетявлӓн лӓкмӹштӹ шижтӓрӓт. Дима дон Петр амаса векӹлӓ тӹшлен анжат. Тӹштӹ кок ӹрвезӹ, Костя дон Антон, кайыт. Тӓнгвлӓ, иктӹ-весӹштӹ лошты тама гишӓн хытырен, йӹрӓлтӓл ашкедӹт.

Д и м а. Теве – мӓмнӓн генийвлӓнӓ. Иктӹм шотыш нӓл: нӹнӹм лӱдӹктен колташ агыл манын, сек пӹтӓри йойын дӓ шӹмӓнрӓк шайышташна вӓрештеш.
П е т р. Яра-яра, кыце келесет, тенге лиэш.

Кок пӱэргӹ сӓмӹрӹк ӹрвезӹвлӓ ваштареш тӓрвӓнӓ.

Д и м а. Тырхалда доко, тӓ вет Костя дон Антон ылыда?

Костя дон Антон пӓлӹдӹмӹ пӱэргӹвлӓ вӹкӹ ӧрӹнрӓк анжалыт.

А н т о н. Ане, но тӓжӹ кӱ ылмынажым кышец пӓледӓ?
Д и м а (шӹмӓнрӓк) . Тӓ компьютерӹм пиш яжон пӓледӓ манытыш. Тӹдӹн доно ровотаен веле агыл, программывлӓмӓт пыртен мыштымыда гишӓн колынна.
К о с т я. Ну и ма?
Д и м а. Мӓ тонна компьютерӹм нӓлӹннӓ, седӹндон тӓмдӓм палшалталаш ядненӓ. Программывлӓм пыртен дӓ настройкым ӹштен пудай. Эче тӹдӹн доно кыце пӓшӓм ӹштӓш келмӹ гишӓн анжыкталыда гӹнь, пишок сусу линӓ ыльы. Идӓ лӱд, мӓ пӓшӓдӓ гишӓн оксам тӱленӓ вет.
К о с т я. Тидӹм ӹштӓш сервисный центр гӹц ӱжӹктӓш лиэшӹш. Эчежӹ мӹлӓм кок цӓш гӹц спортивный секциш кеӓш келеш.
П е т р (пиш пурын дӓ сарвален) . Ну-у, ӹрвезӹвлӓ, идӓ сарвалтарыкты, палшен пуэмӓдӓ?
А н т о н (Костялан) . Ӓлӹмӓ ӹне изишеш сӓрнӓлӹнӓ.
К о с т я. Ну яра, ик цӓшешыжок кен кердӓм.
Д и м а (йӹрӓлтӓлӹн) . Ну вот, хытырен келшӹшнӓ.
К о с т я. Ӹлӹмӹ пӧртдӓжӹ мӹндӹрнӹ ма?
Д и м а. Мӹндӹрнок агыл. Теве тӹдӹ каеш. (Кидшӹ доно шалахай векӹлӓ анжыкта.) .

Цилӓнӓт иквӓреш кеӓш тӓрвӓнӓт. Нӹнӹ ӹнде квартир кӧргӹштӓт лит. Тӹшкӹ пырымы семӹнь Дима лӹмӓн пӱэргет амасам сыравач доно питӹрен шӹндӓ. Кӹдежӹштӹ кок компьютер каеш. Сӓмӹрӹк ӹрвезӹвлӓэт, Костя дон Антон, нӹнӹм ужын, иктӹ-весӹштӹ вӹкӹ ядмашан анжалтыш доно анжалыт.

Д и м а. Ну, анзыкы эртӹдӓ-эртӹдӓ, теве – мӓмнӓн компьютервлӓнӓ. Айда, нӹнӹм чӱктӹдӓ веле.

Антон, ик компьютер лишкӹ миэн, креслӓш шӹнзеш дӓ тӹдӹм чӱктӓ, а Костя сагажырак, туп шайыланжы, шагалын, мониторышкыла тӹшлӓ. Экран валгалтеш.

А н т о н (лишнӹрӓкок шалгышы пӱэргӹвлӓлӓн ӧрӹнрӓк). Тӓмдӓн компьютердӓжӹ уже пӓшӓш колтымы ылешӹш! Керӓл программывлӓӓт кайыт, Интернетӓт улы, мӓлӓннӓ тиштӹ нимам ӹштӓш.
Ӹрвезӹвлӓ, тишецӹн кеӓш манын, вӓрӹштӹ гӹц тӓрвӓнӓт дӓ амаса докыла лишемӹт.
Д и м а (шӹдӹнрӓк) . Та-ак! Стоп! Мӓ тӓмдӓм экскурсиш канденнӓ машанышда ма? (Ӹрвезӹвлӓ докы лишемӹн, ик кидшӹ доно Костям, весӹ доно Антоным шӱдӹнгӹштӹ гӹц кыча дӓ амаса дорцын кӹдеж покшакырак шӹкӓлеш. Нӹнӹжӹ кычымы кид гӹц сӹсӹргӓш цацат.) Яра-яра, идӓ тӹргештӹл, мам шӱдӹмӹнӓм ӹштӓш тӹнгӓлӹдӓ гӹньӹ, тӓ донда нимат ак ли. Торешлӓнӓш тӹнгӓлӹдӓ гӹньӹ, ко-огон ӧпкӓлӓшдӓ вӓрештеш!
А н т о н (лӱдӹнрӓк) . А мам ӹштӹшӓшлык ылына?
Д и м а (ӹнде йӹрӓлтен.) Мам-мам? Компьютер сага шӹнзӹлтӓш яратедӓ вет? Лач тидӹм веле ӹштӓш ядына. А пӓшӓжӹ техеньӹрӓк лиэш, седӹндон тӹшленрӓк колыштда!
П е т р (пачкатанрак сӓмӹрӹк ӹрвезӹвлӓлӓн) . Шӹцдӓ-шӹцдӓ компьютер лишкӹрӓк, тидӹ тӓмдӓн пӓшӓ вӓрдӓ лиэш!
Д и м а. Ну вот, ынгылдарем. (Кӹдеж покшакырак шагалеш.) Ти квартир арендыш нӓлмӹ ылеш, седӹндон тиштӹ тӓ дӓ Петр гӹц пасна иктӓт ак ли. Кынам-тинӓмжӹ ӹшке тергӓш толын лӓктӓм.
П е т р (шая лошкы пырен, Костя дон Антонлан) . Нерӹш караквлӓлӓ идӓ шӹнзӹлт, Диман ынгылдарымыжым тӹшленрӓк колыштда!
Д и м а. Пакыла попем! Петр пӓшӓдӓм оролаш тӹнгӓлеш гӹньӹ, тӓ вес сӓндӓлӹквлӓштӹ ӹлӹшӹ пӱэргӹвлӓм иктӓ-махань яжо ӹдӹрӹн фотожы доно «ӓнгӹрӹш» нӓлшӓшлык ылыда. Тенге шанен лыкмы ӹдӹр лӹм доно вӓшӓ-вӓш Интернет гач сирмӓшӹм сирӓш тӹнгӓлӹдӓ. Шанымашыжы техеньӹ: нӹнӹ гӹц, вуйта подарка шотеш ӓль токышты хыналаш миӓш манын, оксам ядын мыштымыла. А оксам техень счётыш колташ шӱдӹмӹлӓ. (Компьютер сага кишӹ пумагам нӓлеш дӓ Антонлан виктӓлтӓ.) Тӓлӓндӓ план пуалтеш. Тӹдӹм ада шокты гӹньӹ, малын шачмыда гишӓнӓт ӧпкӓлӓш тӹнгӓлӹдӓ. Тиштӹ кечеш вӹц-куд цӓш йӹде ровотайышашлык ылыда.
К о с т я (тыргыжланен) . Ӹшкеок вет пӓледӓ, мӓ тыменьшӹвлӓ ылына. Уроквлӓм нигыцеӓт коден ана керд.
Д и м а (пачкатан) . Уроквлӓм кодедӓ ӓль уке – тидӹ тӓмдӓн пӓшӓ, но планым шоктышашлык ылыда. Ӹштен нӓлмӹ окса гӹц лу процентшӹ тӓмдӓн лиэш – тидӹмӓт шотыш нӓлдӓ. Эче иктӹм вуйышкыда пиштӹдӓ: ти квартир, тиштӹ мам ӹштӹмӹдӓ гишӓн иктӓт пӓлен нӓлшӓшлык агыл, полици моло вычыдымын толын лӓктеш гӹньӹ, пӓшӓм ӹштӹмӹ файлвлӓдӓм пӹсӹн ӹштӹн шушашлык ылыда. Ну ма, тагачеш токыда кен кердӹдӓ, а иргод гӹц пӓшӓшкӹ йӓмдӹлӓлтдӓ, коктын смена доно пӓшӓм ӹштӓш тӹнгӓлӹдӓ, жеп шотышты лоштыда ӹшкеок хытырен келшӹдӓ. (Кидшӹ доно Петр векӹлӓ анжыкта.) Тӹдӹ тиштӹ тӓмдӓм вычаш тӹнгӓлеш.

Дима амасам сыравач доно пачеш, дӓ ӹрвезӹвлӓ квартир гӹц лӓктӹт.
К о с т я. Ой, Антон, кыш коктын вӓрештнӓ? Мӹнь тӹшкӹ кашташ ам тӹнгӓл.
А н т о н. Кашташ ана тӹнгӓл гӹнь, ӹшкеок кольыц вет, мӓлӓннӓ вӓрештеш. Вӹкӹштӹ анжен каеш: нӹнӹ ак шутеп. Эчежӹ цилӓ окса гӹц лу процентшӹ мӓмнӓн лиэш маньы – тидӹ худа ма? А Интернетӹштӹ пыргед шӹнзӓш мӓлӓннӓ нимахань ясыжат уке – тидӹм яжон ӹштен мыштенӓ.
К о с т я (шаналтен) . Уке, кашташ ам тӹнгӓл. Уроквлӓм моло кодаш тӹнгӓлмӹкӹ, ӓвӓмжӹ мам манеш? Тӹнь мӓмнӓн историнӓм пӓлет, вет кок и перви ӓтямӹн ӹлӹмӓш гӹц кен колтымы паштек ӓвӓм пишок ойхырыш. Тӹдӹ мӹлӓм сек лишӹл, сек шергӹ эдем ылеш, седӹндон тыргыжландарымем ак шо.

Кӓрӹш

Кокшы картин

Лиӓлтмаӓш Дима дон Петрӹн арендыш нӓлмӹ квартирӹшток кеӓ. Кӹдежӹштӹшӹ стӧл вӹлнӹ молнамшы семӹньок кок компьютер шӹнзӓ. Коктыге чӱктӹмӹ ылыт. Иктӹжӹ ваштареш Антон шӹнзӓ, тӹдӹ тамам Интернетӹштӹ пыргедеш. Шалахай сӹнзӓжӹ лишнӹ кого кӓкӓ пӓлӹ каеш. Вес компьютер ваштареш, ик ялжым стӧл вӹкӹлӓок лӱктӓлӹн, Петр шӹнзӹлтеш, тӹдӹ тамахань мадышла мадеш.

П е т р (Антон векӹлӓ анжалын, кого юк доно) . Ӓлок, ӓлок, пӓшӓлок. Ти иностранецвлӓ гӹц шукырак оксам кылаш келеш. (Ваштылалын.) Ха-ха, нӹнӹлӓн цеверрӓк ӹдӹрӹн фотожым веле анжыктал, тӹнӓмок ӓргӹшӹш вӓрештӹт!
А н т о н (валышы кымыл доно) . Мӹнь тӹтеӓт шукы жепемок тиштӹ эртӓрем. Школыштат уже пӱлӓ урокым коденӓм. Ӓтям-ӓвӓм пӓлен нӓлмӹкӹ, мӹлӓнем шокшым пуат.
П е т р. Яра мӹньжӹ пурырак ылам. Кӹзӹт попымы шамаквлӓэтӹм Дима колеш гӹньӹ, пӓлет, мам ӹштӓ ыльы?
А н т о н (лӱдӹнрӓк) . Мам?
П е т р (мыскылен ваштылалын) . Мам-мам? Вес сӹнзӓ сагаэтӓт техеньок фонарикӹм шӹнден пуа ыльы. А ӹнет ӹштӹ гӹньӹ, вӓрешет вес ӹрвезӹм кӹчӓл мо дӓ тымды. Эчежӹ тишецӹн карангмы ӓк – кымлы тӹжем тӓнгӓ. Мӓмнӓн техень услови. Седӹндон когонок тишец шӹлнет гӹньӹ, тидӹм шотыш нӓл.
А н т о н. Кӱм мӹнь тишкӹ вӓрешем канден кердӓм? Эчежӹ тинӓр оксажым кышты моам?!
П е т р (вӓржӹ гӹц кӹньӹлмӹ лошты) . А тидӹ – тӹньӹн пӓшӓэт! (Онгжым ик кидшӹ доно ниӓлтӓлеш.) Ой, сырам йӱндӓлмӹ шон колтыш. Лапка якте миэн толшаш гӹнь веле? (Амаса докыла тӓрвӓнӓ.)

Тидӹн годын амаса пачылтеш, дӓ тӹшкӹ Дима Костям шӹкен пырта.
П е т р. Моц дӓ кычен кандышыц, виднӹ!
Д и м а. Мӓ гӹцнӓ кыш шӹлеш? (Костялан.) Ӓлок, тӹшкӹ, анзыкыла! (Ӹрвезӹм тупшы гӹц кого ви доно шӹкӓл шӹндӓ.) Шӹц компьютер сага! Антон тӓнгет теве, вес сӓндӓлӹквлӓштӹ ӹлӹшӹ, уже вӹц эдем доно сирмӓшӹм сирӹкӓлӓ. Но окса шотышты планым ак шоктырак, седӹндон, ужат, махань лицӓӓн шӹнзӹлтеш? Техеньӹ ӹнет кашт гӹньӹ, давай, Интернетӹштӹ пыргедӓш тӹнгӓл веле.
Костя компьютер лишкӹ олен шӹнзеш, кок сӓмӹрӹк ӹрвезӹн анжалтышвлӓштӹ вӓшӓ-вӓшӓ лит. Тидӹн годым амасаш звоньымы юк шакта. Дима амасам пачаш ашкедеш.
Д и м а. Кӱ эче тӹштӹ?!
Пачмы амасашты полици форман эдем каеш. Тӹдӹм ужын, Антон компьютерӹштӹ ылшы файлвлӓм ӹштӹлӓш тӹнгӓлеш. Тидӹм цаклен, Дима сӹгӹрӓлеш.
Д и м а. Антон, файлвлӓм ит ӹшт, тидӹ ӹшкӹмнӓн эдем ылеш! (Ӹнде форман эдем дон Петрлан.) Ӓлдӓ шайышталаш кухняшкы кенӓ.
Кымытын кӹдеж гӹц кеӓт. Ӹнде кухня гӹц когон ваштыл колтымы юкышты веле шакта. Антон дон Костя компьютервлӓ сага шӹнзӓт.
А н т о н (пӹжгенрӓк) . Тӹньжӹм кышты кӹчӓл мон?
К о с т я. Димажы тӹнӓмшӹ семӹньок школ доны вычен шалген. (Кужынрак, ойхын шӱлӓлтен.) Ӹнде коктын мам ӹштӓш тӹнгӓлӹнӓ? Тишецӹн кыце ытленӓ?
А н т о н. Амат пӓлӹ. Ти кечӹвлӓ лошты ӓтямӹм вес гарнизоныш служаш колтат, седӹндон мӓ ӹлӹмӹ вӓрӹмӓт вашталтышашлык ылына. (Тӹшленрӓк мониторышкыжы анжалын.) Тырхал доко, электронный почтыш сирмӓш тольы, векӓт. (Юкын лыдеш.) «Светлана, шергӓкӓнем, весиргодым иктӓ куд цӓш кытлан ирок мӹнь токет самолёт доно чонгештен толам. Кердӓт гӹньӹ, вӓшли. Майкл». (Ойхырышыла, кужынрак шӱлӓлтӓ.) Эчеӓт нимат ак лӓк, векаӓт. Ӹдӹр лӹм доно токыжы миӓш оксам колташ ядынам ыльы, а тӹдӹ ӹшке толеш. Светланажым тӹдӹ сойтокат кӹчӓл ак мо. А вот оксам вычен кишӹ ти скамервлӓ – Дима дон Петр – гӹц мӹлӓм эчеӓт яжонок вӓрештеш.
К о с т я (парняжы доно ышма турежӹ тореш анжыкта) . Шӹп ли, толыт тама!

Тидӹн годым пӱэргӹвлӓ, иктӹ-весӹштӹ доно хытырен, кухня гӹц кӹдежӹш толыт.

Д и м а. Ну ма, Петр, мӓ кешнӓ. А тӹнь когыньыштым яжон тӹшлӹ, йӓрӓ ӹнжӹштӹ шӹнзӹлтеп.

Дима дон форман пӱэргӹ кеӓт.

П е т р (ӹрвезӹвлӓлӓн) . Нерӹш караквлӓлӓ идӓ шӹнзӹлт, айда, Интернетӹштӹдӓ пыргеддӓ! (Онгжым ик кидшӹ доно ниӓлтӓ.) Ох, сыра йӱмӹ, лачокат, пишок шоэшӹш. (Ӹрвезӹвлӓ лишкӹ миӓ.) Тӓ айда паӓшӓлӹдӓ, а мӹнь лапка якте сыра нӓлӓш миэн толам. Кыргыж шӹлӓш путаяш моло тӓлӓндӓ нималан, сойтокат кидӹшкӹнӓ вӓрештӹдӓ, тӹнӓм тӓлӓндӓ эче хударак лиэш! (Кеӓ.)

Вартереш Костя дон Антон коктынок кодыт.

К о с т я (кужынрак шӱлӓлтен) . Тӓ вес вӓре ӹлӓш кеӓш йӓмдӹлӓлтӹдӓ гӹньӹ, тӹлӓт тишецӹн ытлаш куштылгырак лиэш. А мӹлӓнемжӹ мам ӹштӹмӹлӓ?

Кӓрӹш

КОКШЫ КӸДЕЖ

Кымшы картин

Халаштышы ӧлицӓ. Кӱшӹц вуйта лым изиш лымыкалаш цаца, но рокшымок эче мӱден шоктыде. Сценӹштӹ коклы вӹц иӓшрӓк млоец каеш. Кӹжгок агыл курткым чиэн, вуйыштыжы – кепка. Шалахай кидӹштӹжӹ – кого сумка, вургымлаэшӹжӹ пумага лаштыкым кычен.

М а й к л (пумага лаштыкышкыжы анжен) . Светлана, аэропортышты мӹньӹм малын шӹц вӓшли? Толам манын, сирмӓшӹм колтенӓм ыльыш. Йӓрсӹделат гӹнь веле? Та-ак! Йошкар-Ола, Фабричный ӧлицӓ, 45-шӹ пӧрт, 9-шӹ квартир. Капитонова Светлана Даниловна. Ой, Светланаэм, тагачы мӹнь тӹньӹм ужам лиэш. Сусу доно шӱмемӓт пыртка веле. (Сумкыжым ӱлӹкӹ шӹндӓлӓлӹн, вуйыштышы кепкӹжӹм тӧрлӓтӓлӓш цаца.) У-уф! Тиштӹ игечӹ мӓ донышына гӹц ӱштӹрӓк. Анжемӓ, пӹлӹшӓт кӹлмӓ вӓк. (Пӧрт вӹлнӹ сирӹмӹ адресӹм лыдаш цаца. ) Панфилов ӧлицӓ. Кышты вара ӹне Фабричный ӧлицӓжӹ? Иктӓжӹ гӹц ядаш вӓрештеш. А кӹзӹт ӓвӓм докы сирмӓшӹм колташ келеш, тӹте тыргыжланаш тӹнгӓлеш лиэш.

Майкл пумага лаштыкшым кӹшӓнӹшкӹжӹ пиштӓ, вара лишнок ылшы тоӧнгӹлӹш шӹнзеш дӓ сагажы шӹндӹмӹ кого сумкыштыжы пыргедӓш тӹнгӓлеш. Тӹшецӹн ноутбукым лыктеш дӓ, тӹдӹм пачын, пылвуй вӹкӹжӹ шӹндӓ. Ӹнде вуйта электронный почта гач ӓвӓжӹлӓн сирмӓшӹм колта.

М а й к л (парнявлӓжӹ кнопкывлӓм темдӹштӹт, мам сирӹмӹжӹм юкын попен миӓ) . Good morning, ma! Ой, ӓви, нелеш ит нӓл, мӓ вет коктын тӹньӹн шачмы йӹлмет доно марла попаш хытырен келшеннӓ ыльы. Мӹнь миэн шонам, кӹзӹт Йошкар-Олашты ылам. Цецаш Светланам адресшӹ доно кӹчӓл кеем. Цеверӹн, яратымы ӓвиэм! Вычем сирмӓшетӹм.

Майкл ноутбукшым чӱчеш дӓ кого сумкышкыжы пиштӓ. Вӓржӹ гӹц кӹньӹлеш дӓ кӹшӓнжӹ гӹц угӹц адресӓн пумага лаштыкшым лыктеш. Тӹдӹн туре кок кидеш качкыш пакетвлӓм намалшы нӹллӹ вӹц иӓшрӓк ӹдӹрӓмӓш эртӓ.

М а й к л. Госпожа, нелеш идӓ нӓл. Мӹлӓм, пуры лидӓ, келесӹдӓй, кыце Фабричный ӧлицӓм момыла?
Л ю д м и л а (йӹрӓлтӓлӹн) . Кыце-кыце? Госпожа манда?
М а й к л. Ане.
Л ю д м и л а. Госпожавлӓ мӹнь семӹнем кок нелӹ сумка доно ак кыргыжталеп, сӓй?
(Ваштылалын.)
Мӹнь Людмила ылам. Ну яра, кӹзӹт ӹнде мӓ цилӓнӓт вет господин дон госпожа лин шӹнзӹннӓ. Вара мам яднедӓ ыльы?
М а й к л. Фабричный ӧлицӓм кӹчӓлӓм.
Л ю д м и л а. Йошкар-Олаштынажы техень ӧлицӓжӹ улы ма? Тама мӹнь икӓнӓкӓт колделам. Кышец толшы ылыда вара?
М а й к л. Нью-Йорк гӹц ылам. Лӹмем – Майкл.

Ӹдӹрӓмӓш, ӹнянӹдӹмӹлӓ, пӱэргӹ вӹкӹ тусаренрӓк анжалеш. .

Л ю д м и л а. Ну-у, шутяшат эдемӹм монда! Сӓмӹрӹкӓт моло ам ыл ылнежӹ. . (Лишӹцшӹ карангаш манын, ӹшке корныжы доно тӓрвӓнӓ.) .
М а й к л (паштекшӹ ашкылта) .. Excuse me, please! Ой, нелеш идӓ нӓл, пожалуйста! Мӹнь, госпожа Людмила, ам шутьы.
Л ю д м и л а (ашкедӓш цӓрнен) . Ородеш мӹньӹм идӓ уж. Ам шутьы, маныда. Американецвлӓ тенге яжон марлажы шайышт мыштат ма?
М а й к л. А-а, теве тӓмдӓм ма ӧрӹктӓрен ылын. Мӹньӹн ӓвӓм шачынжы тишецӹн, Йошкар-Ола гӹц, ылеш. Сӓмӹрӹкшӹ годым Москвашты тыменьӹн. Тӹнӓм тӹштӹ ӓтямӹм вӓшлин дӓ тӹдӹлӓн марлан лӓктӹн, тенгелӓнлӓ пакылашы ӹлӹмӓшӹжӹ Америка доно кӹлдӓлтӹн. Ӓвӓм доно изинекемок кок йӹлмӹ донат шайыштынна, седӹндон марла попаш тыменяш нелӹ ылде.
Л ю д м и л а (ӧршӹлӓ . Ямакым колтышыла веле чучыдаш!
М а й к л. Лачокат Нью-Йорк гӹц ылам. Ада ӹнянӹ гӹньӹ, паспортемӓт анжыктен кердӓм.
Л ю д м и л а. Паспортым тергаш мӹнь полицейский ылам ма?

Майкл сойтокат онг кӹшӓнжӹ гӹц паспортшым лыктеш дӓ ӹдӹрӓмӓшлӓн виктӓлтӓ. Тӹдет ӹнде шӓргӓлмӹ документӹм анжалде ак цӹтӹ.

Л ю д м и л а (ӧрӹнрӓк) . Лачокатыш! Ада шутьы ылын. Лӹмдӓ – Майкл, мӓмнӓн семӹньжӹ Миколай ылыда, виднӹ. Вара Фабричный ӧлицӓштӹжӹ мам, иктӓ фабрикӹм кӹчӓлӹдӓ ма?
М а й к л (сусун) . Уке, фабрикӹм агыл. Техень ӧлицӓштӹ мӹньӹн яратымы ӹдӹрем ӹлӓ. (Ӹнде онг кӹшӓнжӹ гӹц фотом перегӓлӹн лыктеш дӓ Людмилалан анжыкта.) Вот, госпожа Людмила, анжалда, тидӹ мӹньӹн яратымы Светланаэм.
Л ю д м и л а (фотом тӹшлен анжалеш) . Тама ужмы ӹдӹрлӓ веле чучешӹш!
М а й к л. О-о, госпожа, тӹдӹ тӓмдӓн пӓлӹмӹ эдемдӓ ылеш?
Л ю д м и л а. Пӓлӹмӹ эдем агыл, а тама ужмыла веле чучеш, маньым вет. (Кужын шӱлӓлтӓлӹн.) Техень ӧлицӓжӹм ӹнде кыце кӹчӓл мода вӓл? Эче иктӓжӹ гӹц ядын анжемӓдӓ.
М а й к л. Сек пӹтӓри гостиницеш шагалаш келеш векӓт. Иктӓ цӓш нӓрӹ кӓнӓлтӓлмӹкӹ, пакыла кӹчӓлӓш тӹнгӓлӓм.
Л ю д м и л а. Гостиница келеш маныда? (Кидшӹ доно вургымла векӹлӓ анжыктен.) Теве тӹштӹ, тишецӹн мӹндӹрнок агыл, «Турист» лӹмӓн гостиница улы. Ядышт-ядышт, тӹдӹм кӹчӓл мода, шанем. (Пурын йӹрӓлтӓлӹн.) Ну, яра, мӹнь кыргыжам. Яратымы ӹдӹрдӓм моаш, Майкл, Йымы веле палшыжы! (Кеӓш тӓрвӓнӓ.)
М а й к л. Тау, госпожа Людмила, шаяда шожы!

Майкл вургымла векӹлӓ тӓрвӓнӓ.

М а й к л. О-о, теве махань кӱкшӹ пӧрт каеш, иктӓ луатик этажан, сӓй? Векӓт, тидӹ лач тӹ гостиницет ылеш. (Пӧрт лишкӹ миӓ дӓ вывескӹвлӓм анжен лыдеш.) Уке, тидӹ гостиница агыл. Тиштӹ, каеш, газет дӓ журнал редакцивлӓ вӓрлӓненӹт. Ӹне кыштырак вара гостиницӹжӹ ылеш?

Тидӹн годым кӱкшӹ зданин ӧлицӓш лӓкшӹ амасажы пачылтеш, дӓ тӹштӹ кымлы иӓшрӓк ӹдӹрӓмӓш каеш.

М а й к л (ӹдӹрӓмӓшлӓн) . Нелеш идӓ нӓл, госпожа, кыце лишӹл гостиницӹм момыла?
А л и н а. Гостиницӹм ядыда? Тӹдӹ теве тӹштӹ. (Вургымла векӹлӓ кидшӹ доно анжыкта.) Тишкок каеш.
М а й к л. Пиш кого тау. Эче иктӹм яднем: Фабричный ӧлицӓ кыштырак вӓрлӓнен?

Уже пакыла ашкедӓш тӓрвӓнӹшӹ Алина лӹмӓн журналист цӓрнен шагалеш, векӓт, ти пӱэргетӹн ӧлицӓ гишӓн ядмашыжы изиш ӧрӹктӓрӹш.

А л и н а. Махань ӧлицӓ маныда?
М а й к л. Фабричный.
А л и н а. Техень ӧлицӓ Йошкар-Олашты уке.
М а й к л. Кыце уке?
А л и н а. Ӧрдӹж вел гӹц толшы ылыда ма?
М а й к л. Ане.
А л и н а. А кышецӹн?
М а й к л. Америкӹштӹшӹ Нью-Йорк хала гӹц.
А л и н а (ӧрӹнрӓк) . Нью-Йорк гӹц?!

Тагыш талашышы журналистет ӹнде Майкл докы лишкӹрӓк веле лишемӹ.

А л и н а. Тенгежӹ, пӓлӹмӹ линӓ, мӹньӹн лӹмем – Алина. Журналист ылам.
М а й к л. Мӹнь Майкл ылам, бизнесмен. Тишкӹ яратымы ӹдӹрем докы толынам. Коктын Интернет гач пӓлӹмӹ линнӓ.
А л и н а (тамам тумаялын) . Интернет гач пӓлӹмӹ линнӓ, маныда?
М а й к л. Ане. Лӹмжӹ – Капитонова Светлана Даниловна.

Алина, кӹшӓнжӹ гӹц блокнот дон ручкам лыктын, тамам тӹшӓкен ыдыралеш.

А л и н а. Маняр жепеш тишкӹ толында?
М а й к л. Вӹц кечеш.
А л и н а. Лӹмжӹ пӓлӹ гӹньӹ, кӹчӓл анжаш лиэш. Иргодым кечӹвӓл паштекрӓк токем звонялтыда, теве тӓлӓндӓ – визиткем. (Визитный карточкыжым Майкллан виктӓлтӓ.) Нелеш идӓ нӓл, кӹзӹт мӹлӓм пӓшӓ доно кыргыжаш келеш, вараш кодаш ак яры. (Кеа.)
М а й к л (ашкедшӹ журналист векӹлӓ анжен) . Тау тӓлӓндӓ, госпожа Алина! (Кидӹштӹжӹ ылшы визиткӹм кӹшӓнӹшкӹжӹ перегӓл пиштӓ.)

Кӓрӹш

Нӹлӹмшӹ картин

Кок кидешӹжӹ продуктан пакетӹм кычышы Людмила ӹшке квартирӹшкӹжӹ пыра. Пӧкенӹш пакетвлӓжӹм шӹндӓлӓлӹн, кем дон вӹлвӓл выргемжӹм кыдашеш. Вара пакетвлӓжӹм нӓлеш дӓ кӹдежӹш намал толеш. Онгышкыжы запоным сӓкӓлтен, цӓшӹшкӹ анжалеш.

Л ю д м и л а. Уже тинӓр веремӓ шон колтен?! Качкаш ирокок шолтенӓм, цилӓ йӓмдӹ, ӹрӹктӓлӓш веле кодеш. А Костя эргӹмжӹ кышты ылеш? Молнам вадеш тенге кужын ак кычалт ыльыш.
Кандымы пакетшӹм охыремдӓш тӹнгӓлеш, тӹшецӹн стӧл вӹкӹ сыкырым, колбасам, икманяр охырец дон помидорым дӓ ыжар лукым лыктеш.
Л ю д м и л а (помидор, охырец дӓ лукым тарелкӓш пиш-тӹмӹжӹ лошты) . Эргӹм салатым ярата. Толмашешӹжӹ эче тӹдӹм йӓмдӹлӓлшӓш. Цецаш нинӹм мышкындалам дӓ падырештен шӹндем, вӹкӹжӹ патылым веле пиштӓлӓлӓш кодеш.

Ӹдӹрӓмӓш, тарелкӓм кидӹш кычен, кӹдеж гӹц лӓктеш, вуйта кавштавичӹ хӓдӹрвлӓм мышкаш кухняшкы кеӓ. Кӹдежӹштӹ иктӓт уке ылмы годым тӹшкӹ Костя пыра. Тӹдӹ валышы кымылан ылеш. Талашыдеок выргемжӹм кыдашаш тӹнгӓлеш. Ик ялаш донок шагал кодеш. Кыдашмы тыгыр дон джемпержӹм шкафыштышы плечикӹш сӓкӓлтӓ, вара пӧкен шурышты кечӹшӹ футболкым чиӓш тӹнгӓлеш. Тидӹн годым кӹдежӹш ӓвӓжӹ пыра, кидӹштӹжӹ – йӓмдӹ салатан тарелкӓ. Ӓвӓжӹ векӹлӓ тупынь шалгышы дӓ футболкыжым чиӓш путайышы Костян тупыштыжы кого кӓкӓ пӓлӹ каеш. Тидӹм ужын, Людмила вӓрӹштӹжок вуйта тӹнгшӹ ганьы лиэш.

Л ю д м и л а (ӧрӹн дӓ тыргыжланен) . Эргӹм, техень кого кӓкӓжӹ тупыштетшӹ кышецӹн?
К о с т я (чиӓш тӹнгӓлмӹ футболкыжым йӹлерӓк шыпшыл тӧрлӓш цацен, сылыкын) . Кыце лин, амат пӓлӹ.

Ӓвӓжӹ эргӹжӹ лишкӹ миӓ дӓ тӹдӹм шӹмӓн элтӓлӓ.

Л ю д м и л а. Костюшем, шергӓкӓнем, остатка веремӓн тамалын-ӓнят соок валышы кымылан ылат. Ма, иктӓ-ма лин гыце? Тама Антон тӓнгетӹмӓт ам уж, молнам со иквӓреш каштыда дӓ тӹдӹ токынаат шӹренок толеш ыльыш? (Вургымла кидшӹ доно эргӹжӹн вуйжым шӹмӓн ниӓлтӓ.)
К о с т я. Нимат лиде, ӓви.
Л ю д м и л а. Эргӹм, ӓвӓ шӱм цилӓ шижеш. Ужамыш, тама тӹньӹн йӓнгетӹм тырыжеш. Эче теве тупыштет – махань кого кӓкӓ.
К о с т я (вуйжым лӱктӓлӹн, ӓвӓжӹн лицӓшкӹ тӹдӹм ӹжӓлӓйӹмӹлӓ анжалеш) . Ӓви, тӹньӹм тыргыжландараш агыл манын, ӹнем попы ыльы, но шайышташ вӓрештеш. (Изишеш шӹп лимӹ паштек.) Мӹнь скамервлӓн кидӹш вӓрештӹнӓм.
Л ю д м и л а (тыргыжын) . Скамервлӓн кидӹш? Нӹнӹжӹ кӱ техеньӹ ылыт?
К о с т я. Кыце тӹлӓт ынгылдарышаш? Тидӹ компьютерӹштӹ Интернет палшымы доно оксам ӹштен нӓлӓш цацышы эдемвлӓ. Шамак толшеш, иктӓ цевер ӹдӹрӹн фотожым Интернетӹн сайтышкыжы пыртат, тӹдӹлӓн шанен лыкмы лӹмӹм пуат, ӹлӹмӹ вӓржӹмӓт весӹм анжыктат. Фотоштышы ӹдӹрет иктӓ иностранецлӓн келшӓ гӹньӹ, вӓшӓ-вӓш электронный почта гач сирмӓшӹм сирӓш тӹнгӓлӹт. Скамервлӓэт нӹнӹ гӹц ӹдӹр лӹм доно вуйта подарка шотеш ӓль хыналаш миӓш корны роскотлан оксам колташ ядыт. Ти оксаэтшӹ скамервлӓн кӹшӓнӹш вӓрештеш.
Л ю д м и л а. Ӹне тӹньжӹ нӹнӹлӓн малын келӓт?
К о с т я. Лач ти пӓшӓжӹм Антон доно когылянна ӹштӹктӓт, кыце маншаш, Интернетӹштӹ пыргедӹнӓ.
Л ю д м и л а. А тӓ идӓ ӹштӹ дӓ тӹшкӹ идӓ кашт.
К о с т я. Нӹнӹ силом ӹштӹктӓт, ана ми гӹнь, шит, мӓмнӓм школ доны моло оролен шалгат.
Л ю д м и л а. Ой, эргӹм, айда тенгежӹ полициш йӓвенӓ.
К о с т я. Ам пӓлӹ, стоя ӓль уке. Теве тагачы тӹшкӹ тӹхеньок форман ик эдем толын ыльы. Мӓ Антон доно ынгылышна: тӹдӹ дӓ нӹнет икышын пӓшӓм ӹштӓт. Нӹнӹ мӓлӓннӓ ӹлӓш ирӹкӹм ак пуэп лиэш, дӓ эче мӓок вуйнаматыш лӓктӹнӓ, вуйта вет ӹнде нӹнӹн командышты ылына.
Л ю д м и л а. Ӹне вара мам ӹштӓш тӹнгӓлӹнӓ?
К о с т я. Антонлан куштылгырак. Тӹдӹн ӓтяжӹ, пӓлет вет, офицер ылеш. А военныйвлӓэтӹм ик вӓр гӹц весӹш со ваштылыт. Шукышты агыл нӹнӹ семняге тишецӹн кеӓт.
Л ю д м и л а. Ӹне Антонжын ӓтя-ӓвӓжӹ тӹшкӹ вӓрештмӹдӓ гишӓнжӹ пӓлӓт ма?
К о с т я. Уке, ак пӓлеп, тӹдӹ нӹнӹлӓн попыде.
Л ю д м и л а (тыргыжын) . Ой, Йымыжат, мӓжӹ ӹне мам ӹштӓш тӹнгӓлӹнӓ? Эксӹкӹш вӓрештмӹ гӹнь, тенге шӹнзӹлтӓш ак яры. Палшыкымат нигӱ гӹц ядаш. (Ик жепеш шӹп лиэш, вара манеш.) Ӓнят, тӹньӹм папат докы Кировыш колташ? (Эргӹжӹн пулышышкыжы ик кидшӹм шӹмӓн пиштӓ дӓ сылыкан анжалтышыжы доно тӹдӹн сӹнзӓшкӹжӹ анжалеш.) Тидӹн шотышты мам манат?
К о с т я. Мӹнят тидӹ гишӓн шаненӓм ыльы. Вет Антон доно тӹшецӹн каранг ана керд гӹнь, мӓӓт нӹнӹ семӹньок преступникеш шотлалташ тӹнгӓлӹнӓ, хоть ти пӓшӓм мӓлӓннӓ силомок, лӱдӹктен дӓ шин ӹштӹктӓт. Ӓнят, ӓви, Кировышкыжы иквӓреш кенӓ? Трӱк нӹнӹ, мӹньӹм кӹчӓлӹн, тишкӹ толын лӓктӹт, а тӹнь тонна ӹшкетӹн лиӓт.
Л ю д м и л а. Мӹньжӹ ам ке, сӓй, эргӹм, вет квартирӹм хоза гӹц пасна шуэн кодаш ак ли. Эчежӹ тӹньжӹ тӹштӹшӹ школышты икманяр жеп тыменял кердӓт, тидӹн шотышты хытырен келшӓш лиэш, шанем, а мӹлӓм вот пӓшӓ вӓрӹм шуэн кодымыла лиэш. Тӹнь ит ойхыры, мӹнь кӓнӹш кечӹ йӹдеок токет толаш тӹнгӓлӓм.
К о с т я (ӹнде куштылгынрак шӱлӓлтен) . Тенгежӹ, ӓви, папи докыжы кынам кыдалаш?
Л ю д м и л а. Цецаш мӹнь пӓшӓштӹшӹ вуйлатышемлӓн звонялтем дӓ иргодеш кечӹм ядам. Колта гӹньӹ, коктын иргодым ирокок кыдалына. А кӹзӹт качкаш шӹцок.
К о с т я (стӧл лошкы шӹнзеш) . Тама качмемжӓт ак шо.
Л ю д м и л а (салатан тарелкӓм Костя лишкӹрӓк шӹндӓ.) Качкаш келеш, эргӹм, качде ак яры. Цецаш мӹнь эче ӹрӹктӹмӹ лемӹм дӓ котлетӹм кандем.

Людмила ик кидеш лем, весеш котлет тарелкӓвлӓм намал толеш дӓ стӧл вӹкӹ шӹндӓ. Тидӹн годым телефон юк шакта. Ӹдӹрӓмӓш трубкам нӓлеш.

Л ю д м и л а. Алло, колыштына! Антон ылат ма? Цецаш Костялан трубкам пуэм.
К о с т я (телефон трубкам нӓлеш) . Мӹнь ылам. Ма-ма? Телевизорым йӹлерӓк чӱктӹ, манат? Цецаш. (Телефон трубкам пиштен, талашалын, телевизорым чӱктӓ.)
Л ю д м и л а. Ма тӹштӹ, иктӓ-ма лин гыце?
К о с т я. Ам пӓлӹ, телевизорым веле пӹсӹнрӓк чӱктӓш шӱдӹш.

Чӱктӓлтшӹ телевизор дорцын юк шакта. Костя, пӧкенӹш шӹнзӹн, тӹдӹм пиш тӹшлен анжа. Ӓвӓжӓт, ма лиӓлтмӹм ынгылыде, телевизор векӹлӓ вуйжым сӓрӓлӹн тӹшлӓ.

Т е л е в и з о р ю к. Дмитрий Петров дон Петр Федоров, уже ик гӓнӓ тюрьмӓштӹ шӹнзен лӓкшӹвлӓ, маскывлӓм чиэн, хала тӹрӹштӹшӹ лапкашкы тӹштӹ нӓлшӹвлӓ уке ылмы годым пыренӹт дӓ, пистолет доно лӱдӹктен, пӹркӓшӹк гӹц шӱдӹ тӹжем тӓнгӓ оксам пуаш ядыныт. Преступниквлӓ вычыдымын лапкашкы толын лӓкшӹ кок полицейскийӹн кидӹш вӓрештӹнӹт. Следстви тӹнгӓлӓлтмӹкӹ, нӹнӹн эче ик худа пӓшӓштӹм пӓлен нӓлмӹ: тӹлзӹ анзыц, ик предприятиш окня вашт пырен, кок компьютерӹм шолыштыныт. Кӹзӹт преступниквлӓ следственный изиляторышты ылыт. Нӹнӹм анзылны суд выча.

К о с т я (вӓржӹ гӹц кӹньӹлеш дӓ куштылгынрак шӱлӓлтӓ) . Ӓви, тидӹ нӹнӹ ылыт!
Л ю д м и л а. Нӹнӹ?! Махань йӹрнӹк эдемвлӓ. (Эргӹжӹ докы миэн, тӹдӹм шӹмӓн элтӓлӓ.) Тенгежӹ, эргӹм, лӹплӓнӹ дӓ, качкындалмыкет, уроквлӓэтӹм ӹштӓш шӹцок. Йымылан тау, нӹнӹ ӹнде полицин кидӹштӹ ылыт.

Кӓрӹш

Вӹзӹмшӹ картин

Халаштышы ӧлицӓ. Тӹдӹн мычкы, ик векӹ дӓ вес векӹ анжылтын, Майкл ашкедеш. Тӹдӹ ӹнде вес выргемӹм, шокшыракым, чиэн. Кидӹштӹжӹ пакет каеш. Лишнӹ ылшы скамням ужын, тӹшкӹ шӹнзеш. Пакет гӹцӹн ноутбукым перегӓл лыктеш, молнамшы семӹньок тӹдӹм пачеш дӓ пылвуй вӹкӹжӹ шӹндӓ.

М а й к л. Ӓвӓм сирмӓшӹмӓт сирен шоктен, сӓй. Электронный почтем анжалшаш. (Сусун) . О-о, улы-улы! (Юкын лыдаш тӹнгӓлеш.) «Good afternoon, son! Шергӓкӓнем, тӹнь вот мӹньӹн шачмы вӓрӹштем, Йошкар-Олашты, ылат. Эх, кыце кӹзӹт тӹнь вӓрӹштет лимем шоэш! Йӓнг йыла гӹнят, нимат вашталтен шӹндӓш ак ли. Мары йӹлмӹм худан агыл пӓлет, седӹндон халык доно хытырашетӓт куштылгырак, сӓй. Ну кыце, Светланаэт доно вӓшлиӓлтӹндӓ? Коктын тӹдӹлӓн лапкашты айырымы шӓшкӹ (норка) ыжганажы моло лачеш ли? Цеверӹн, эргӹм! Вычем уверетӹм. Тӹньӹм шокшын шыпшалам».

Ӓвӓжӹн сирмӓшӹм лыдын лӓкмӹкӹ, Майкл ноутбукшым питӹрӓ дӓ мӹнгеш пакетӹшкӹжӹ пиштӓ. Скамня гӹц кӹньӹлӹн, пакыла ашкедӓш тӓрвӓнӓ. Тидӹн годым кӹшӓнжӹ гӹц изи телефонжым дӓ визиткӹм лыктеш.
М а й к л. Журналист Алина докы пӹтӹрӓлшӓш, тӹдӹ вет кечӹвӓл паштекрӓк звоняш шӱден ыльы. Ӓнят, Светланаэм гишӓн иктӓ-мам пӓлен нӓлӹн. (Визиткым анжен, изи телефоныштыжы номервлӓм темден миӓ. Журналистет вуйта трубкам нӓлӹн.) Пуры кечӹ лижӹ, госпожа Алина!
А л и н а (ӹшкежӹ сценӹштӹ ак кай, но юкшы шакта) . Пуры кечӹ, Майкл!
М а й к л. Иктӓ-махань увер доно сусуэмден кердӹдӓ ма?
А л и н а. Уке, Майкл. Капитонова Светлана Даниловна лӹмӓн эдем Йошкар-Олашты ак ӹлӹ. Пӓлен нӓлӹнӓм: Капитонова фамилиӓн кок эдем улы, нӹнӹ логӹц иктӹжӹ Мария Петровна, весӹжӹ Ирина Павловна ылыт.
М а й к л (сусу лимӹ гань) . Ӹне, госпожа Алина, нӹнӹн адресӹштӹм пуэмӓдӓ? Ӓнят, логӹцӹштӹ иктӓжӹжӹ Светланаэм ылеш.
А л и н а. Мӹнь тенге ам шаны.
М а й к л. Малын?
А л и н а. Иктӹжӹ вӹцлӹ ӹндекш иӓш ылеш, весӹжӹ – кудлу шӹмӹтӓш. Тӓ, каеш, компьютер доно пӓшӓм ӹштӹшӹ мошенниквлӓ – скамервлӓ – доно алталалтында.
М а й к л (тодылалтшы кымыл доно) . Тенге лӓктеш, виднӹ. Яжонок алталатынам.
А л и н а. Нерӹм идӓ сӓкӹ, Майкл, ӹлӹмӓшӹштӹ тамаат лиӓлт кердеш. Тенгечӹ вӹц кечеш толынам манда вет. Мары Эл Республикӹнӓн столицӹжӹ доно пӓлӹмӹ лин кердӹдӓ. Тиштӹ йӓнгӹм кымылангдышы вӓр шукы. Эчежӹ, тӹвеш, маняр театр, музей улы…
М а й к л (ойхырышыла, кужынрак шӱлӓлтен) . Тенгеок ӹштӓш вӓрештеш, мам гостиницӹштӹ йӓрӓ киӓш? Ну яра, госпожа Алина, хоть-ма гӹнят, тӓлӓндӓ пиш кого тау! Цеверӹн!
А л и н а. Цеверӹн, Майкл! Иктӓ-махань палшык керӓл лин колта гӹньӹ, идӓ шеклӓнӹ, пӹтӹрӓлдӓ.

Майкл сылыкын телефонжым, тенгеок визиткӹм кӹшӓнӹшкӹжӹ пиштӓ дӓ вӓржӹ гӹц тӓрвӓнӓ. Лишнӹжок кечӹшӹ афишӹвлӓ вӹкӹ анжалеш. Иктӹжӹ тӹдӹм когонок ӧрӹктӓрӓ.

М а й к л (афиша докы лишемӹн, сусун) . Светлана! Тидӹжӹ мӹньӹн Светланаэмӹш! (Кӹшӓнжӹ гӹц фотом лыктеш дӓ, афишӹштӹшӹ фото доно тӓнгӓштӓрен, то тӹшкӹ, то тишкӹ анжал колта.) Тӹдӹ, седӹ! (Афишӹштӹ мам сирӹмӹм лыдаш тӹнгӓлеш.) Мырызы Соколова Марина. Иргодым вадеш – тӹдӹн концертшӹ. Итӓй, кышты вара лиэш? Драмтеатрын сценӹштӹжӹ манын сирӹмӹ. Билетшӹмӓт, виднӹ, тӹшток выжалат. Ядышт-ядышт, ти театрым моаш келеш.

Ӧлицӓ мычкы, кок векӹлӓ анжылтын, Майкл пакыла ашкедеш. Тидӹн лошток шайылан киэн кодшы афиша вӹкӓт сӓрнӓл-сӓрнӓл анжал колта.

М а й к л. О-о, мӹньӹн Светланаэм! Тӹньӹм кӹчӓл монам, манаш лиэш!

Лишӹц эртӹшӹ пӱэргӹ гӹц театр кышты ылмым ядеш, тӹдӹжӹ шалахай векӹлӓ кидшӹ доно анжыкта.

М а й к л (сусун). Цецаш концертӹш билетӹм нӓлӓм, а иргодым ирокок кого дӓ цевер пеледӹш ӓршӓшӹм йӓмдӹлем. Пеледӹш ӓршӓш пумы годымок тӹдӹлӓн кандымы ыжгамат подарем.

Кӓрӹш

Кудымшы картин

Ти картинлӓн пасна декораци ак кел. Мары выргемӓн ӹдӹр сцена вӹлнӹ мырым мыра. Майкл залышты, концертӹм анжышывлӓ лошты, шӹнзӓ. Мыры пӹтӓ. Халык лапам рӱжге шиӓш тӹнгӓлеш. Сцена вӹкӹ куштылгы ашкылтышвлӓ доно вӹлнӹжӹ яжон шӹнзӹшӹ у костюман пӱэргӹ куза, ик кидӹштӹжӹ – пеледӹш ӓршӓш, вес кид донжы кӓп тервенжӹ шергӓкӓн у шӓшкӹ ыжгам пӹзӹрӓл кычен, биркӹжӓт вӓк каеш.

М а й к л. О-о, Светлана, нӓлдӓ мӹньӹн кид гӹцем ти цевер пеледӹш ӓршӓшӹм!
М а р и н а (ӓршӓшӹм кычымыжы лошты) . Мӹнь Светлана агыл, а Марина ылам.
М а й к л. Нелеш идӓ нӓл, госпожа Марина, ӹнде мӹнь тӓлӓндӓ ти ыжгам подарынем.
М а р и н а (ыжгам ужын) . Мӹнь техень шергӓкӓн подаркам нӓлӹн ам керд!

Мырызын попымыжым шотыш нӓлде, Майкл тӹдӹн тупышкыжы ыжгам сӓкӓлтен пуа. Тидӹн годым анжышывлӓ рӱжге лапам шит.

М а р и н а. Ну яра, толькы концерт пӹтӹмӹкӹ, тӹшкӹ, токем, кузыда, ыжгадам мӹнгеш пӧртӹлтем.
М а й к л (ӹдӹрлӓн йӹрӓлтӓлӹн) . Кузем, обязательно кузем!

Майкл, сусу кымылан, сцена гӹц залыш вала. Мырызы Марина эче ик марла мырым мыра, вара видӹшӹ концерт пӹтӹмӹ гишӓн увертӓрӓ. Марина кулиса шайыц мӹнгеш сценӹш лӓктеш, кид вургешӹжӹ тӹ шергӓкӓн ыжгаэтӹм лыпшалын. Йӓрӓ кидшӹм лепкӓжӹ докыла виктӓлтен, залыш тӹшлен анжа, вуйта анжалтышыжы доно Майклым кӹчӓлеш. Тидӹн годым сценӹш угӹц Майкл куза.

М а р и н а (Майкллан ыжгам виктӓлтӓ) . Нӓлдӓ, пуры лидӓ, ыжгадам!
М а й к л. Мӹнь ыжгалан кузыделам. Тӹдӹ – тӓлӓндӓ. (Кӹшӓнӹштӹшӹ фотожым лыктеш дӓ ӹнде тӹдӹн доно ваштарешӹжӹ шалгышы ӹдӹрӹм тӓнгӓштӓрӓш тӹнгӓлеш.) Госпожа Светлана, ой, нелеш идӓ нӓл, госпожа Марина, тидӹ вет тӓ ылыда? (Фотом ӹдӹрлӓн анжыкта.)
М а р и н а (ыжгам Майкллан кычыктен, фотом кидӹшкӹжӹ нӓлеш. Ӧрӹнрӓк) . Мӹнь ылам! Фотоэмжӹ тӓ докыдажы кыце вӓрештӹн?
М а й к л (йӹрен дӓ сусун.) Интернет гач. (Ӹшкежӹ Маринам анжалтышыжы доно пырола.) Шӹмӓ шамакан, кымылым лӱктӹшӹ сирмӓшвлӓлӓндӓ пиш кого тау!
М а р и н а (ӧрӹн) . Мӹньӹн сирмӓшвлӓлӓн?! Кышкы сиренӓм, тӓ докыда?!
М а й к л. Ане. Мӹнь докем Нью-Йоркыш.
М а р и н а (эчеӓт ӧрӹн) . Америка гӹц ылыда ма?
М а й к л. Лӹмем Майкл ылеш. Тӹшецӹн лӹмӹн тӓ докыда толынам.
М а р и н а. Нелеш идӓ нӓл, мӹнь иктӹн докат сирмӓшӹм сирӹделам. (Вургымла кидшӹм лӱктӓлӹн, шӓргӓшӹжӹм анжыкта.) Мӹнь марлан кешӹ ӹдӹрӓмӓш ылам. (Тама гишӓн ӹшкедурешӹжӹ шаналталын, ваштыл колта.) Э-э, ӹнде ынгылышым, векӓт!
М а й к л. Мам ынгылышда, госпожа Марина!
М а р и н а. Ну-у, Полина, американец доно моло сирмӓшӹм сирен шалгымыжы гишӓнӓт мӹнь гӹцем шӹлтен вет!
М а й к л (ӧрӹн) . Нимат ам ынгылы! Махань Полина гишӓн попедӓ?
М а р и н а. Мӓ Полина доно йӹгӹр пелӓшвлӓ ылына. Коктын цӹлт иканьы кайына, ӓтя-ӓвӓнӓ гӹц пасна мӓмнӓм иктӓт айырен ак керд. Тӹдӹ цецаш токем толшашлык.

Тидӹн годым лишкӹштӹ пишок веселӓ ӹдӹр (Марина ганьырак кайшы ӹдӹрӹм айыраш келеш) кыргыж толеш дӓ Маринам элтӓлен шӹндӓ. Майкл то иктӹжӹ, то весӹжӹ вӹкӹ пишок тӹшлен анжа.

П о л и н а (йӹрен) . Нелеш ит нӓл, Марина, мӹньӹн дежурство ыльы, седӹндон концертӹшкет толын шӹм керд. А ӹнде вот кок кечӹ йӓрӓ ылам. Вара кыцерӓк мырышыц?
М а р и н а. Цилӓ яжо ылмыла чучеш, анжышывлӓлӓн келшен, шанем. Тевеш, ти млоец гӹц ядын кердӓт. (Майкл векӹлӓ вуйжым сӓрӓлӹн) . Ну, концертемжӹ хоть шӱм семешдӓ ыльы?
М а й к л (ӹнде анжалтышыжым Полина вӹлец ак карангды, но Маринан ядмашешӹжӹ вӓшештӓ). Яжон мырышда, юкдажат шӹжвӹкӹн семӹньок йонгалты.
П о л и н а (Мариналан). Тидӹжӹ тӹньӹн творчестветӹм ӓклӹшӹ церотан поклонник ма? (Шутялтен) . Ужат, махань шергӓкӓн ыжга доно сагаэт шалгылтеш.
М а р и н а. Шутен ит шалгы, Полина, тидӹ тӹньӹн Майклет ылеш.
П о л и н а (ӧрӹнрӓк) . Мӹньӹн Майклем? Но мӹнь нимахань Майклымат ам пӓлӹ. Эчежӹ, Марина, ӹшкеок пӓлет: йӓнгемӹм сӓртен кердшӹ млоецӹм эче вӓшлиделам. (Тидӹн годым ӹшкежӹ тӹшленрӓк Майклын сӹнзӓшкӹжӹ анжалеш дӓ анжалтышыжым вуйта шеклӓнерӓк карангда.)
М а р и н а. Кыце ат пӓлӹ? Тӹдӹн доно вӓшӓ-вӓш Интернет гач сирмӓшӹм сирен шалгендӓш! Нью-Йоркыш ик сирмӓшӹмӓт колтыделам маннет? Майкл, фотодам анжыктыда доко?
Майкл кӹшӓнжӹ гӹц фотом лыктеш. Марина тӹдӹм нӓлеш дӓ Полиналан виктӓлтӓ.
М а р и н а. Тидӹ тӹнь ат ыл ма? Тӹнь ылат!
П о л и н а (йӹрӓлтен). Мӹнь ылам, манат? Изинӓ годым кӱн тӹрвӹ кӱшӹлжӹ кенвацмашеш панды доно ыдыралтын дӓ пӓлӹкӹм коден? Тӹньӹн! Фотоштетшӓт теве пӓлдӹрнӓ!
М а р и н а. Лачокатыш, тидӹ мӹнь ылам. Тенгежӹ, тӓгӱ мӹньӹн фотоэм Интернетӹштӹшӹ сайтыш пыртен кычылтын гыце?!

Майкл ӹдӹрвлӓн попымыштым тӹшлен колыштеш, но анжалтышыжы ӹнде – со Полина вӹлнӹ.

П о л и н а. Э-э, икечӹ газетӹштӹ тамахань скамервлӓ гишӓн сирӹмӹ ыльы. Нӹнӹ тенге ровотаят ма? (Йӹрӓлтӓлеш) .
М а й к л. Алина лӹмӓн журналистӓт тенгеок попа. (Марина векӹлӓ сӓрнӓлӹн.) Ну, госпожа Марина, ти ыжгам тӓлӓндӓ подаренӓм, тӹдӹм мӹнгеш нӓлдӓ. (Марина докы лишемӹн, тупышкыжы ыжгам угӹц сӓкӓлтӹнежӹ.)
М а р и н а. Ой, уке, мӹнь марлан кешӹ ӹдӹрӓмӓш ылам манын попышым вет, седӹндон йӓл пӱэргӹ гӹц техень шергӓкӓн подаркам нӓлӓш йӧнӓн агыл. Полиналан вот подарен кердӹдӓ, шанем.
П о л и н а. Тӹнь ма, Марина, мӹнят техень подаркам нӓлӹн ам керд! Дӓ мам манын нӓлӓм?!
М а й к л (ик кидшӹ доно ыжгам кӱшкӹрӓк лӱктӓлӹн). Ӹне тӹдӹн доно мам ӹштӹмӹлӓ? Шуэн колташ гыце? А вет ти ыжгам лапкашты ти ӹдӹрлӓн ӓвӓм доно айыреннӓ. (Фото вӹкӹ анжыкта.)

М а р и н а (тодылалтшы кымылан Майклым ӹжӓлӓен). Полина, подарка шотеш нӓлӓй, тӹте яжоат агыл дӓ эдемжӓт ӹжӓлӹн веле чучеш.

П о л и н а. Яра ӹне.

Майкл ыжгам сусун Полинан тупыш сӓкӓ.

П о л и н а (шутенрӓк) . А мӹнь ма доно кӱсӹжӹм пӧр-тӹлтӹшӓшлык ылам?
М а й к л (сусун йӹрӓлтӓлӹн) . Тиштӹ, Йошкар-Олашты, мӹнь эче кым кечӹ лиӓм. Тӓ лешӓнгӹ госпожа Мариналан кок кечӹ йӓрӓ лиӓм манда, седӹндон мӹлӓм сӹлнӹ халадам анжыкташ ядам, вес семӹньжӹ, экскурсоводем лидӓ.
П о л и н а. Яра, Майкл, хытырен келшӹшнӓ.
М а й к л (Полина вӹкӹ анжен) . А кыце иргодымжы тӓмдӓм кӹчӓл моам?
П о л и н а (изи тӓпнӓк гӹцшӹ ручка дон пумага лаштыкым лыктеш дӓ, тӹшӓкен тамам сирӓлтен, Майкллан виктӓлтӓ). Теве мӹньӹн телефон номерем дӓ адресем.
М а й к л (пумага лаштыкым нӓлеш дӓ лыдеш) . Эчеӓт мӹнь ам алталалт?
М а р и н а (ваштылалын) . Идӓ лӱд, Майкл, мӓ тӹ скамервлӓэт ана ыл вет!
Кӓрӹш

Шӹмшӹ картин

Ӧлицӓштӹ пеледӹш выжалымы киоск каеш. Тӹштӹ пӹркӓшӹк – Людмила – пеледӹшвлӓм ик яжо ӓршӓшӹш пога дӓ тӹдӹм вӹдӓн ӓтӹш шагалта. Вара, кӹшӓнжӹ гӹц изи телефоным лыктын, тагыш звоня.

Л ю д м и л а. Алло, Костя, тидӹ мӹнь звонем! Тагачы кокшы урокна уке лиэш маньыц. Токына кемет годым, эргӹм, корныгешӹлӓ токем, пӓшӓшкӹ, пыралалай. Мӹнь ремонтым ӹштӓш кок банка чиӓм нӓлӹнӓм, тӹте ӹшкӹлӓнем намал кеӓш нелӹрӓк лиэш. (Изишеш шӹп лиэш, вуйта Костян попымыжым колыштеш.) Ну яра, тенгежӹ, вычем.

Ӧлицӓ мычкы, иктӹ-весӹштӹ доно хытырен, ӹдӹр дон млоец ашкедӹт. Попымы лоштышты вӓрӹштӹштӹ моло шагалал колтат. Тидӹ – Полина дон Майкл. Полина ош курткым, пидмӹ ош калпакым дӓ джинс брюкым чиэн. Майклат – джинс ялаш доно, вуйыштыжы – шим калпак, кӓпӹштӹжӹ – тӹхеньок цӹреӓн куртка.

П о л и н а (Майкл вӹкӹ йӹрӓлтен анжалын) . Сек пӹтӓри, Майкл, мӹлӓм келесӹдӓй, марла тенге яжон попашыжы кышты тыменьӹндӓ?
М а й к л. Ӓвӓм тымден.
П о л и н а (ӧрӹнрӓк) . Ӓвӓдӓ?
М а й к л. Ане.
П о л и н а. Тӹдӹжӹ мары йӹлмӹжӹм кышец пӓлӓ?
М а й к л. Ӓвӓм Йошкар-Олашты шачын-кушкын, тӹдӹ марын ылеш. Москвашты пӓлӹмӓшӹм погымыжы годым ӓтям, тӹнӓмшӹ сӓмӹрӹк американец, доно пӓлӹмӹ лин. Ушнымышты паштек Нью-Йоркышты ӹлӓш тӹнгӓлӹнӹт. Вара мӹнь шачынам. Мӹлӓнем Майкл лӹмӹм пуэнӹт. Тенге гӹнят ӓвӓм мӹньӹм ӹшке семӹньжӹ Миколай манаш ярата. А мӹлӓм тидӹжӹ келшӓ веле.
П о л и н а (сылыкынрак шӱлӓлтен.) Тенгежӹ, ӓвӓдӓн Америкӹш ӹлӓш ванжымыжы паштек шачмы велжӹ доно кӹлжӹ кӹрӹлтӹн.
М а й к л. Уке, кӹрӹлтде. Лишӹл родня йыхна тиштӹ кодде гӹнят, тӹдӹ и йӹдеок Йошкар-Олашкы толын кеӓ. Тидӹн паштекшӹ тӹдӹ вуйта ӹшкежӓт шылдырангеш.
П о л и н а. А тӓжӹ Йошкар-Олаштыжы пӹтӓриш гӓнӓ веле ылыда ма?
М а й к л. Уке-э! Изиэм годым кок гӓнӓ ӓвӓм сага толын кенӓм. Но тӹдӹн годшен хала тӹргачок вашталтын.
П о л и н а. Ане, тӹдӹ кечӹнь вашталт миӓ. Тенгежӹ, тӓлӓндӓ сек пӹтӓри мам анжыктышаш вӓл?
М а й к л (йӹрӓлтӓлеш дӓ ӹдӹрӹн пулышыжым кок кидшӹ доно шӹмӓн кыча). Мӹньӹм, Полина, «тӓ» агыл, а «тӹнь» ман. Мӹнят тенгеок попаш тӹнгӓлӓм.
П о л и н а (веселӓн) . Яра, Майкл, мӹнь тидӹн доно келшем. Та-ак, сек пӹтӓри тӹлӓт мам анжыктышаш вӓл? Спорт дворецӹм гыце? (Майкл векӹлӓ анжалтышыжым сӓрӓлӹн.) Ну, ӹшке гишӓнет мытыкын шайыштал пу? Тыменят ӓль пӓшӓм ӹштет?
М а й к л. Мӹнь бизнесмен ылам, ӹшке ресторанвлӓэм улы.
П о л и н ат (шутялтенрӓк) . Маняр ресторанет вара улы?
М а й к л. Нӹлӹт. А тӹнь мам ӹштет? (Йӹрӓлтӓлӹн.) Тенгечӹ Мариналан дежурство гӹц толынам манметӹм кольым.
П о л и н а. Мӹнь больницӹштӹ ровотаем, врач ылам.
М а й к л. О-о, махань керӓл професси.
П о л и н а. Керӓлжӹ керӓл, дӓ эче опытемжӹ чӹдӹ: тене веле мединститутым тымень пӹтӓренӓм.
М а й к л. Ну и ма, жеп эртӹмӹ семӹнь опыт ӹшке погына. (Тидӹн годым Майклын кӹшӓнӹштӹшӹ телефонжы юкым лыктеш.) Нелеш ит нӓл, Полина, тӓгӱ токем звоня.

Эдемжӹ ак кай, но Майклын ӓвӓжӹн юкшы вуйта телефон гӹц шакта.

М а й к л ы н ӓ в ӓ ж ӹ. Good afternoon, son!
М а й к л. Good afternoon, мother!
М а й к л ы н ӓ в ӓ ж ӹ (сусу юк доно) . Ну, кыцерӓк, эргӹм? Светланаэтшӹ доно вӓшлиӓлтӹнӓт?
М а й к л. Ане, ӓви, тӹдӹ сагаэмок шалга.
К э т р и н. Ӹне телефонетӹм тӹдӹлӓн пуэмӓ, мӹнь анзыкылаш шешкем доно здороваялтнем.
М а й к л. Яра, ӓви. (Майкл телефонжым Полиналан виктӓлӓ.) Ӓвӓм тӹнь донет ик-кок шамакым пелештӹнежӹ.

П о л и н а (ӧрӹн) .
Полина виктӓлтӹмӹ телефоным ӹнежӹ кычы, но Майкл кидӹшкӹжок неволя пуа.

М а й к л (Полинан сӹнзӓшкӹжӹ тӹшленрӓк дӓ шӹмӓн анжалын) . Попы-попы, ит ӧр, мӹньӹн ӓвӓм пиш пуры ӹдӹрӓмӓш ылеш.

Майкл вӹкӹ анжен, ӹдӹр ӹнде телефоным олен пӹлӹш докыжыла лӱктӓлеш.

М а й к л ы н ӓ в ӓ ж ӹ (тенгеок ӹшкежӹ ак кай, а юкшы шакта) . Пуры кечӹ лижӹ, Светочка!
П о л и н а. Пуры кечӹ лижӹ! Толькы вет мӹнь Светлана ам ыл.
М а й к л ы н ӓ в ӓ ж ӹ (ӧрӹнрӓк) . Светлана ада ыл? Тенгежӹ, мӹнь нимат ам ынгылы. (Юкшы шӹплӓнӓ.)

Полина телефоным Майкллан мӹнгеш виктӓлтӓ. Эргӹ ӓвӓжӹ доно угӹц попаш тӹнгӓлеш.

М а й к л. Ӓви, тидӹ эчеӓт мӹнь.
М а й к л ы н ӓ в ӓ ж ӹ. Тенгежӹ, Светланам вӓшлиделат дӓ вес ӹдӹр доно пӓлӹмӹ линӓт ма?
М а й к л. Тӹдок ылеш. Толмыкем, тӹлӓт цилӓ ынгылдарем. Цеверӹн, яратымы ӓвиэм!
М а й к л ы н ӓ в ӓ ж ӹ. Цеверӹн, шергӓкӓнем! Толметӹм цӹтен-цӹтӹде вычаш тӹнгӓлӓм!

Майкл попаш цӓрнӓ дӓ телефонжым кӹшӓнӹшкӹжӹ пиштӓ.

П о л и н а. Ӓвӓдӓжӹ махань Светлана гишӓн попа?
М а й к л. Мӹньжӹ вет вуйта тӹ фотоштышы Светлана докы толынам. Тенгежӹ, тӹнь докет.
П о л и н а (йӹрӓлтӓлӹн) . Ит путыйы! Тидӹ вет Маринан фотожы.
М а й к л. Тӓжӹ вет вӹд патькалтыш ганьок коктын иканьы ылыда, ӹшкӓлӓ.

Майкл пеледӹш киоск докыла вуйжым сӓрӓлеш дӓ, Полинан кидшӹм кычен, тӹшкӹлӓ сусун виден кеӓ.

М а й к л (пеледӹш выжалышылан) . Пуры кечӹ лижӹ! Мӹлӓм теве тӹ цевер ӓршӓшӹм пудай!
Л ю д м и л а (Майклым пӓлен колта дӓ йӹрӓлтӓ) . Пуры, пуры лижӹ, господин Майкл!
М а й к л (ӹшке лӹмжӹм колын, ӹдӹрӓмӓш вӹкӹ тӹшленрӓк анжалеш) . О-о, тидӹ тӓ ылыда, госпожа Людмила!
Л ю д м и л а (пеледӹш ӓршӓшӹм виктӓлтӹмӹжӹ лошты) . Ане, мӹньӹ. Ужамат, ӹдӹрдӓм кӹчӓл монда.
М а й к л (ӓршӓшӹм Полиналан кычыктымыжы лошты). Монам, госпожа Людмила. Толькы Светланам агыл, а Полинам. (Полина вӹкӹ шӹмӓн анжалеш.) Ну, цеверӹн, мӓ кешнӓ!
Л ю д м и л а (паштекӹштӹ) . Цеверӹн! Йымы тӓлӓндӓ цӓшӹм пужы!

Майкл дон Полинан пеледӹш киоск дорц карангмы кытлан тӹшкӹ, ӓвӓжӹ докы, Костя толеш. Ӹдӹр дон млоец ӹнде пакыла ӹшке корнышты доно ашкедӹт.

К о с т я (ӓвӓжӹлӓн) . Кӱвлӓ доно тенге шайыштат ыльы? Пӓлӹмӹ эдемвлӓ ылыт ма?
Л ю д м и л а. Пӓлӹмӹжок агылеп, дӓ млоецшӹм икечӹ ужынам ыльы. Пӓлет, ӹдӹр докы кышец толын?
К о с т я. Кышецӹн?
Л ю д м и л а. Америкӹштӹшӹ Нью-Йорк хала гӹц.
К о с т я (ӧрӹнрӓк) . Америка гӹц, манат? (Ӹнде ӹшке ӹшкӹлӓнжӹ.) Анжок, Интернет гач сирӹшӹ Майклет тиштӓт ылеш, виднӹ.
Л ю д м и л а (Майкл манмым колын, ӓвӓ эргӹжӹлӓн) . Тӹдӹн лӹмжӹ Майкл ылмыжым кышец пӓлет?
К о с т я. Тидӹ тӹнӓмет Антонлан Майкл доно ӹдӹр лӹм доно вӓшӓ-вӓш сирмӓшӹм сирӓш вӓрештӹн ыльы. Толькы Светланажым кыце мон кердӹн? Тӹштӹ вет шанен лыкмы лӹм дон адрес веле анжыкталтыныт.
Л ю д м и л а. Мон, виднӹ. Мӹлӓм тӹнӓм анжыктымы фотоштышы ӹдӹрок доко, толькы лӹмжӹ весӹ, Полина ылеш.
К о с т я (изи телефонжым кӹшӓнжӹ гӹц лыктын, тӹштӹ цӓшӹм анжалеш.) . Ну яра, ӓви, мӹлӓм ӹнде кыргыжаш келеш. Кышты крӓскӓӓн пакететшӹ?
Л ю д м и л а. Тӹштӹ, лыкышты, шӹнзӓ. (Киоск кӧргӹшкӹлӓ анжыкта.)
К о с т я (киоск кӧргӹш пырен, пакетӹм нӓлеш дӓ ӓвӓжӹлӓн ласкон йӹрӓлтӓлеш) . Мӹнь ӹне кыргыжам!
Л ю д м и л а. Яра, шергӓкӓнем. Лем дон плов – холо-дильникӹштӹ, ӹрӹктен качкындалок!
К о с т я. Яра, ӓви! (Пӹсӹн кеӓ.)
Л ю д м и л а (эргӹжӹ паштек анжен) . Эх, тӹньӹм, эргӹм, ышан-шотаным ял вӹкӹ куштен шагалташ Йымы йӧнӹм веле пужы! Пакыла ӹлӓшнӓ тилошты ужмы гань «шим пӹлжӹ» веле нигынамат ӹнжӹ тол ыльы!

Кӓрӹш

КЫМШЫ КӸДЕЖ

Кӓндӓкшӹмшӹ картин

Тӱнӹ вуйта ӹнде рокым лым изиш мӱдӓлӓлӹн. Майкл «Аэропорт» манын сирӹмӓн здани сага шалга. Тӹдӹ, скамняшкы сумкыжым шӹнден, сотовый телефоныштышы цӓшӹм анжалеш.

М а й к л (тыргыжланен, ик векӹ дӓ вес векӹ анжылтеш) . Кышты ӹне Полинажы? Мӹньӹм ыжаташ толаш лин ыльыш. Эчеӓт алталалтым ма? Ой, уке, сӓй. Та-ак, самолётыш шӹцмешкӹ, эче пел цӓш утла улы.

Тидӹн годым вуйта машинӓ юк шакта. Сценӹштӹ Майклын подарымы шергӓкӓн ыжгам чишӹ Полина каеш. Тӹдӹ млоец докы пӹсӹн лишемеш. Майкл ӹдӹр ваштареш сусун ашкылта.

П о л и н а (шӱлештӹл) . Ой, Майкл, толын шоктышым! Смена пӹтӹмӹ годымрак нелӹн церлӓнӹшӹ эдемӹм скорый машина шыпштен кандыш. Тидӹн велдӹк пӓшӓштӹ кычалташ вӓрештӹ, седӹндон нелеш ит нӓл.

Радиоузел доно вуйта самолётыш посадкым увертӓрӓт. Майкл, айырлымы жеп лишеммӹм шижӹн, ӹдӹрӹн кидшӹм шӹмӓн кыча. Полинаат тӹдӹн сӹнзӓшкӹжӹ сылыкынрак анжа.

М а й к л. Вот и айырлаш жеп. (Тамам келесӹнежӹ, но йӹлмӹжӹ тӹкӹлӓлтеш, дӓ шаяжы вес темыш веле ванжа.) Хала мычкы экскурсим ӹштӹметлӓн, тенгеок ыжаташ толметлӓн пиш кого тау. Айырлымешкӹнӓ, лицӓ гӹцет тӹньӹм шыпшалаш лиэш?

Полина пулышыжым «ам пӓлӹ» маншыла тӓрвӓтӓлеш. Майкл Полинам лицӓжӹ гӹц шыпшалеш дӓ, скамняшты ылшы сумкыжым кидӹш нӓлӹн, вокзал амаса докыла тӓрвӓнӓ.

М а й к л (кидшӹм Полиналан ӹрзен) . Электронный сирмӓшем ӓль телефон доно звоньымем вычы!

Полина вӓрӹштӹжӹ ӹшкетшок шалген кодеш. Скамня векӹлӓ анжалын, тӹшкӹ шӹнзеш.

П о л и н а (кужынрак шӱлӓлтен, сылыкынрак) . Вот кыце ӹлӹмӓшӹштӹ лин кердеш ылын! Ти кечӹвлӓ лошты веле Марина анзылны, йӓнгемӹм сӓртен кердшӹ млоецӹм вӓшлиделам манын, веселӓн шутен шалгышым. Кӹзӹтшӹ ма мӹнь донем лин?! Майкл тишец кеш веле, а йӓнгемжӹ тӹдӹн гӹц пасна уже сылыклана…

Тидӹн годым изи сумкыштыжы кишӹ телефонжы юкым лыктеш. Полина тӹдӹм кидӹш нӓлеш. Майкл звоньымым пӓлен нӓлӹн, ӹдӹр пишок ӹвӹртӓ.

П о л и н а (олманга гӹцӹн пӹсӹн кӹньӹлеш) . Мӹнь, Майкл, тӹньӹм колыштам!
М а й к л (ӹшкежӹ ак кай, но юкшы шакта) . Полина, шергӓкӓнем, мӹнь уже самолётышты шӹнзем, тӹдӹ шукышты агыл кӱшкӹ вӹсӓлтеш, а йӓнгем тӹнь сагаэт кодын. Колат?! Лешӓнгӹ попаш йӹлмем ӹш сӓрнӓлт, но ӹнде келесем: тӹнь мӹлӓнем свет вӹлнӹжӓт лач иктӹ веле ылат, яргата тыл доно валгалтшы шӹдӹрем! Мӹнь тӹньӹм шӱм вашт яратен шӹнденӓм!
П о л и н а. Яратен шӹнденӓм, манат? (Сылыкын. ) Мӹньӹнӓт шӱмем, Майкл, сагаэт кеӓ!

Телефон кӹл кӹрӹлтеш.

П о л и н а. Алло, Майкл, кыш ямыц?! (Валышы кымыл доно телефонжым изи сумкышкыжы пиштӓ дӓ вӓржӹ гӹц тӓрвӓнӓ.)

Тидӹн годым вокзал амаса пачылтеш. Сумкаан дӓ тенгеок охыр кидшӹм кок векӹлӓ сусун шӓрен, тӹшецӹн Майкл кыргыж лӓктеш.

М а й к л. Полина, яратымем!

Млоец докыла туп доно ылшы Полина лишкӹжӹ талашышы Майкл векӹлӓ вуйжым сӓрӓлеш. Коктын элтӓлӓлтӹт, дӓ тӹрвӹвлӓштӹ вӓшӓ-вӓш ушнат. Тидӹн годым вуйта кӱшнӹ чонгештӹшӹ самолётын юкшы шакта.

П о л и н а (кӱшкӹлӓ анжалын) . Майкл, ужат, сомолётет чонгештӹш!
М а й к л. Вӹсӹжӹш! Тишецӹн эче ик рейс веле агыл лиэш. (Полинан кок пулышыжым кычен дӓ ӹдӹрӹн сӹнзӓшкӹжӹ шӹмӓн анжен.) Мӹнь токем, Нью-Йоркыш, тӹнь гӹцет пасна ӹнем чонгештӹ!..

Кӓрӹш

Мычаш

Запись опубликована в рубрике Uncategorized. Добавьте в закладки постоянную ссылку.

2 отзыва на “Пӓлӹдӹмӹ, но лишӹл

  1. «Пӓлӹдӹмӹ, но лишӹл» пьесӹн авторжы Е.Егоркина-Тихонькинан шаяжы:

    Скамервлӓн худа пӓшӓштӹ – тидӹ Интернет палшымы доно шачшы у лиӓлтмӓш (явлени). Тӹдӹ утларакшы Йошкар-Олашты виӓнгӹн. Пьесӹштем лач ти темӹм тӓрвӓтенӓм. Мары сӹлнӹшаяшты техень темеш сирӹмӹ произведеним мӹнь эче ужделам. Лач газетвлӓштӹ веле икманяр материал пецӓтлӓлтӹн, радио дӓ телевизор доно шоэн-шоэн увервлӓ йонгалтыныт.
    Пьесӹштӹшӹ Майкл лӹмӓн персонажем семӹнь Германиштӹ ӹлӹшӹ ик сӓмӹрӹк пўэргӹ иктӓ кым и перви Йошкар-Олаштышы Чехов єлицӓштӹ ӹлӹшӹ ӹдӹр докы толын кеен. Но техень єлицӓштӹ тӹдӹн кӹчӓлмӹ пєртшӓт ылде, ӹдӹр доно вӓшлиӓлтӓшӓт йєн лиде.
    Скамервлӓ ӹшке худа пӓшӓшкӹштӹ кӓпеш шодымы ӹрвезӹвлӓм шыпшыт, нӹнӹлӓн ти пӓшӓм лӱдӹктӹл-лӱдӹктӹл ӹштӹктӓт. Тидӹ гишӓнӓт газетвлӓштӹ ик гӓнӓк веле агыл лыдалтын. Техень «кӓпшӹлӹш» вӓрештшӹ ӹрвезӹвлӓлӓнжӹ кыце лиӓш, мам ӹштӓш? Вет тидӹжӹ эче кӓпеш шодымы икшӹвӹлӓн веле агыл, ӓтя-ӓвӓлӓнӓт кого шытырым дӓ тыргыжланымашым канда. А ӓтяде кушшы тетялӓн дӓ шачшыжым ӹшкетӹнок ял вӹкӹ шагалташ цацышы ӓвӓлӓн тидӹжӹ махань кого ойхы!
    Пьесӹштӹ Майкл алталалтын гӹнят, ӹшке цӓшӹжӹм сойтокат мон.
    Ти произведеништем мары йӹлмӹ гишӓн темат єрдӹжеш кодде. Америкӹштӹ ӹлӹшӹ марын ӹдӹрӓмӓш ӹшке эргӹжӹм марла попаш тымден, мары йӹлмӹ докы кымылангден. А мӓжӹ, Йошкар-Олашты ӓль Мары Элӹн вес халавлӓштӹжӓт ӹлӹшӹвлӓ, тидӹм ӹштенӓ дӓ ӹшке икшӹвӹнӓм шачмы йӹлмӹнӓ докы кымылангденӓ ма? Техень ядмашат пьесӹм лыдшым шанаш тӓрвӓтӹшӓшлык.
    А «Цикмӓ»-н редакторжы Валерий Аликовлан пьесем журналын страницӹвлӓэш вӓрӓнгдӹмӹжӹ гишӓн кого таум келесем. Пӓшӓдӓ анзыкыжымат ашнен шалгыжы дӓ туты лӓктӹшӹм веле пужы!

    Кого шӓлӓ доно Елизавета Яковлевна

  2. Со йӓрсӓш ак ли, но ти гӓнӓ сотыки Елизавета Егоркинан пьесыжым пачаш-пачашок лыдын лӓктӹм. Лачокат, мары сирӹшӹвлӓ лошты техень темеш произведенийвлам кӹзӹт ужаш ак ли. Автор сӹнзӓгӹрӓт тагачшы кечӹштӹ ылшы проблемывлам тӹкӓлеш, кыце маныт, кидшӹм ӹлӹмӓшӹн вӹршӓрӹштӹ кыча, тидӹжӹм лыдаш пиш интересно. Мане, Йошкар-Олашты ти йӧнӓн преступленим шукын ӹштенӹт ылын дӓ вара Йошкар-Олана тидӹ гишӓн цилӓ мир вӹлнӓт кымдан пӓлӹмӹ лин. Пъесы яжо шачын, иктӓ театрышты мадын пуат ыльы гӹнь, анжалашат лиэш.
    Тиштӹ тевеш мары йӹлмӹ гишӓнат попалтеш. Тӧр сирӹмӹ, йӹлмӹнӓ ямын кеӓш цаца, шукынжок ӹшке шачмы йӹлмӹштӹм монден шуэнӹт, тетявлӓштӹм ак тымдеп, интернетӹштӹт теве кыдыжы пеле -марла, пеле-рушла вактыт. Тидӹ гишӓн мӹнь тилошты Йоласал кӹдӓлӓш школышты тыменьшӹвлӓ анзылнат попышым. Но мӹнь ӧрӹм веле, кыце яжон Йоласал школышты мары йӹлмӹм тымдат, учениквлӓ мары поэтвлӓн лыдышвлӓштӹм шайыштыт, ӹшке туан семеш мыренӓт-куштенӓт мыштат. Ӹшке йӹлмӹнӓм ямдаш ак кел, вет йӹлмӹнӓм ямдымыкына, ӹшке лӹмдернӓмӓт ямденӓ лиэш, ӹшкежӓт ямына, Мары републикынажат ямеш, вара мӓмнӓм цилӓн ташкаш веле тӹнгӓлӹт, кого пӱӓм пӱэн шӹнден, вӹд лӹвӓкӹ ӹштен шуат.

Добавить комментарий для ондрин валька Отменить ответ

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s