Пентти Саарикоски

Лыдышвлӓ

Тӓ шанендӓ пӧртвлӓэм шӧртньӹ дон ши гӹц ылыт
нӹнӹ кӱ дон пу гӹц ылыт
кыце мӹньӹн кӓпем лу дон шӹл гӹц

***

Ит тол мӹнгеш Quetzalcoatl
тиштӹ ӹнде вес йымывлӓлӓн ыдылыт
тӹньӹн кекетӹн пынвлӓжӹ ӱл ак доно
универмагвлӓштӹ выжалат
тӹньӹн йӓрвлӓэт кӹлмӹктӹмӹ вӓрвлӓ ылыт
ошмаотывлӓ (острок) гӹц ошмаотывлӓш кӹвервлӓ
халыкым орландарымы вӓрвлӓ
пӧртвлӓн окнявлӓ гӹц
нерат лишӹвлӓн сӹнзӓвлӓ
кымда плацыш анжат кыды вуйнаматдымывлӓн
вӹреш якшарген
ит тол мӹнгеш
Quetzalcoatl
тьотявлӓн тьотявлӓэтӹн религиштӹм
ит монды

*Quetzalcoatl (Кетцалькоатль) — ацтеквлӓн пантеонышты науатль йӹлмӹштӹ «пынан кӹшкӹм» анжыкта, кыды Кого йымывлӓ логӹц иктӹжӹ ылеш.

* * *

Пӓшӓм ӹштӹшӹвлӓ дӓ мӹшкӹрӓнвлӓ, тӓмдӓм алталымы
тинӓр гӓнӓ, маняры тӓлӓндӓ куштылгырак ӹлӹмӓшӹм сӧрӹмӹ
тидӹ паштек ӹлӹмӓшлӓн намалтыщыжы нелӹрӓк веле лин
паянвлӓ гӹц ытлалташ манын пайдам погаш вӓрештӹн
тидӹжӹ лачокат агыл ма?
таксиштӹ шӹнзем дӓ токына кыдалам
техень кечӹ ыльы, кыды Гераклитӹм ӓшӹндӓрӹктӓ
аяр кырык неркӓшкӹлӓ анжа
тӹштӹ лым аравлӓ киӓт
тӱнымбал пишок пӓлӹ ыльы
кидвурды гань, кыды молнамат мӹлӓнем кычыкым пуэн.

* * *

Теве ти кӱ вӹлнӹ тӹлӓт шӹнзӓшет яжо лиэш Эзра
тӹдӹн лишнӹ олмаву кушкеш дӓ йӓктӹ
нӹнӹ ӹшке семӹньӹштӹ кушкыт
котивлӓ пылвуйышты шӹнзӓш яратат
кечӹ ӹшке орбитыжы доно сӓрнӓ
шимӹнгӹжӹн ӹлӹштӓшӹжӹ кидӹшкӹ нӓлмӹкӹ
дӓ шӓрвлӓжӹм тӹшленрӓк анжалмыкы папирус пышан ылеш
тӹнь куштылгырак тоныш пӓшӓм Элиотлан пуэт ыльы дӓ мӓлӓннӓ цилӓлӓннӓ

* * *

Лым шыла

момоцаш шылтымы вӹд ситӓ
кечӹгыт вуйыштем ма-шон сӓрнӓ
лач ӓтямӱлӓндем веле мӹньӹ кӹчӓлӓм
вадыат олен лишемӹ
момоца платя вӹлнӹ шӹнзем
Дьула Иллешӹн* книгӓжӹм лыдам
парым пуэм
ум ӹлӹмӓштем пӓлен нӓлӓм:
книгӓвлӓӓт пӱжӓлтӹт
ӹшкӹмемӹм мышкам шӱӓлтем коштем
итӹрӓ выргемӹм чиэм

*Дьула Иллиеш (Gyula Illyes, 1902-1983) кымдан пӓлӹмӹ венгр поэт, прозаик.

* * *

Гомер

Сока (слӧпӧй) ылеш манаш тӹнгӓлмӹкӹ тӹдӹ цилӓ утла тӹшлен ужын
тагачы тӹдӹ критика анжалтышан
тӹдӹн нержӹ симсӓлгӹ-якшаргы
дӓ тӹдӹ критика анжалтышан:
лыдышыштем утла шукы охыр шая
дӓ льоргымаш веле — ма вӓл тӹдӹ когонжок ылеш
лыдышвлӓ прессуен шӹндӹмӹвлӓ лишӓшлык ылыт
мӹньжӹ вӓшештем дӓ келесем:
кынам сирем калявонган шӹргӹштӹ вуйта ылам
дӓ кӹчӓлде ик калявонгымат ат мо
тӹшкӹ дӓ тишкӹ шоаш келеш
понгым моам гӹньӹ вуйжым веле агыл нӓлӓм
вурдыжымат важшымат мӹнь нӓлӓм
рокшымат нӓлӓш цацем
тидӹжӹ гӹнь ӓнят самӹнят ылеш
но лыдышын ӹшке цӹрежӹ дӓ шӹргӹжӹ
лишӓшлык
яжо поэт
лыдышвлӓм ак чангы
нӹнӹм тӹдӹ кӹчӓлеш

***

Тиранвлӓ эдемвлӓ ылыныт
кыдывлӓ выргемьштӹм кыдашыныт дӓ чиэнӹт
йыд якте пӓшӓленӹт
пумагавлӓм ик вӓр гӹц вес вӓрӹш намалыштыныт
эдемвлӓм вӓр гӹц вӓрӹш шыпшедьшӹнӹт
толшы почта йӓшӹк гӹц кешӹ почта йӓшӹкӹш
администрациштӹ ӹнде пуры йӓнгӓнвлӓм ит вычы
тиранвлӓм рационализируйымы
нӹнӹ машинӓвлӓ ылыт
кыдывлӓ ак янгылеп
йӱкшӹ лимеш ак йӱэп
ял чымалтен ак куштеп
нӹнӹ тенге попат вуйта пышкылшы кӹртниваштырым шыпшыт
дӓ тӹнӓм кӱ ылметӹмӓт пӓлен нӓлӓт:
тӹнь ылат Икшӹ кокшы кымшы ӓль нӹлӹмшӹ вӹзӹмшӹ кудымшы шӹмшӹ ӓль ноль
техень машинӓвлӓм шанен лыкделыт ылгецӹ
тиранвлӓжӓт акат лиэп ылын

* * *

Грек антологи гӹц

Аполлинари

Туп шайылнем мӹнь гишӓнем худам попы.
мӹнь ам шӹдешкӹ но кынам анзылнем яжом веле попет, тидӹм ам тырхы.

* * *

Македони Консул

Окса докы шык пӱэргӹомыныштыжы окса шӱндӹкӹм ужын, лӱдӹн колтен, понгыжалты. Йӹрӹм-йӹржӹ тӹ незер ылмашок — амален кеш, молнамшылаок ладнан.

* * *
Пӓлӹдӹмӹ поэт

Тангыж мардеж ылам ылгецӹ
тӹнь тангыж сирӹш толат ыльы
дӓ онгетӹм вишок ӹштет ыльы
Ылам ылгецӹ!

* * *

Юлиан Египетӹм вуйлатышы

— Тӹнь утла шукым йӱнӓт Анакреон, дӓ коленӓт
— Кыце тӹнь ӹшке ӹлӹмӓшетлӓн
мычашым канден кердӹнӓт?

* * *
Пентти Саарикоски (1937-1984) гишӓн «Цикмӓ» журналын 2-шы номерӹштӹжӹ сирӹмӹ. Лыдышвлӓм «Грек антологи» (Jalkapolku-kreikkalaisesta antologiasta, 1977, Otava) дон «Танцыш ӱжмӓш» (Tanssiinkutsu, 1980, Otava ) лыдыш книгӓвлӓ гӹц сӓрӹмӹ.

a href=»https://tsikma.files.wordpress.com/2011/01/kylvaja.jpg»>

Реклама
Запись опубликована в рубрике Uncategorized. Добавьте в закладки постоянную ссылку.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s