Вуйжырым мешӓкеш ат шӹлтӹ

Елизавета Егоркина
Шайыштмаш

Шӹжӹшӹ игечӹ ӹшке цевержӹм пыток анжыкташ цаца: кечӹ кӱшӹц шӹмӓн анжа, пушӓнгӹвлӓштӹшӹ сар дӓ якшар ӹлӹштӓшвлӓм эче яргатаракым, векӓт, ӹштӹнежӹ. Техень яжо игечӹжӹ, попашат уке, кымылымат пишок лӱктӓ. Пенсионер Нинаат, ӧлицӓшкӹ окня вашт анжалын, тоныжы шӹнзен ӹш цӹтӹ.
– Вады качкышым шолташ тӹнгӓлӓш эче ирӹрӓк,– маньы ӹшкедурешӹжӹ ӹдӹрӓмӓш.– Вет пелӓшем дон ӹдӹрем пӓшӓ гӹцӹн куд цӓш эртӓлӓлмӹ кытлан веле толын шот. Ире воздух доно шӱлӓлтен, лапка якте сӓрнӓл толшаш. Тевеш, анжемӓ, кечӹжӓт вуйта, тонет мам шӹнзӹлтӓт маншыла, окня вашт сӹнзӓм йӹмӹктӓрӓ.
Нина, вӹкӹжӹ вӹцкӹжрӓк курткым чиэн, коридорыштат ли дӓ нӹлӹмшӹ этаж гӹц ӱлӹкӹлӓ ташкалтыш мычкы куштылгын, кыргыжмылаок, валыш. Мам вара, тӹдӹ кӓнӹшӹш пел и анзыц веле лӓктӹн. Ӹшкежӹ пенсионер ылеш гӹнят, кӓп тидӹм ак шиж ганьок. Эче яратымы бухгалтер пӓшӓштӹжӹ пӓшӓлӓш дӓ пӓшӓлӓш веле ыльы, но тӹдӹн начальникшӹ – кафем вуйлатышы нӹллӹ кок иӓш ӹдӹрӓмӓш Марина Павловна – Нинам ӹшке кабинетӹшкӹжӹ ӱжӹктенок шижтӓрӹш:
– Нина Ивановна, ӹнде вет пенсионер ылыда, кӓнӓш кеӓш моло ада шаны ма? Сӓмӹрӹквлӓлӓн вӓрӹм пуаш келеш.
Техень шаям колмыкы, Нинан кымылжы пишок тодылалты гӹнят, тидӹм вӹкӹ пӓлдӹртӓш ӹш цацы. Тӹдӹ тенгерӓк веле маньы:
– Кӹзӹток, Марина Павловна, заявленижӹм сирӹшӓш ма?
– Уке, лач кӹзӹтшок агыл, тӓмдӓн вӓрӹш тене университетӹм тымень пӹтӓрӹшӹ ӹдӹр толшашлык. Пӓшӓ опытшы уке, седӹндон ик тӹлзӹ лошты тӹдӹм тымдалалашда вӓрештеш. Тореш ада ыл вет? – Марина Павловна ӹнде вуйта сарвалымыла яды.
– Тымдалалам, тӹте пумагавлӓэм лоэш ямеш лиэш,– маньы Нина Ивановна.
Иргодешок кафешкӹ сӓмӹрӹк ӹдӹр тольы. Тымдымы лошты ӹлӓлшӹ ӹдӹрӓмӓшет пӓлен нӓльӹ: тидӹ – Марина Павловнан лишӹл родыжы. Ӹнде вуйлатышын тӹдӹм пӓшӓ гӹц малын кеӓш талаштарымыжым Нина Ивановна яжон ынгылыш, седӹндон ик тӹлзӹ эртен кемӹм цӹтен-цӹтӹде вычыш. Тӹшецӹн кемӹжӹ годым йӓнгӹштӹжӹ куштылгылыкым, тенгеок цӹтен керддӹмӹ тамахань ясым ик семӹньок шижӹ. Ӹнде тидӹ годшен пел иӓт эртен кеш…
…Ӧлицӓшкӹ лӓкмӹкӹ, Нина тӧрӧк лапка векӹлӓ ӹш талашы, тӹдӹ пӧрт лишнӹ кушшы пушӓнгӹвлӓ докы миш. Ваштар лӹвӓлӓн шагалын, кӱшкӹлӓ анжальы. Мардеж ӹфӹлӓлмӹжӹ семӹнь укшвлӓм тӓрвӓтӓлеш. Теве-теве вӹкӹжок сар ӹлӹштӓш вӹсӓ, паштекшӹ – весӹ, кымшы. Нӹнӹм анжен, Нина сусу кымылжым шӹлтӓш ӹш цацы, тӹдӹ, йӹрӓлтӓлӹн, ӱлӹк миэн шошы ик ӹлӹштӓшӹм, вара весӹм, кымшым кидӹшкӹжӹ нӓльӹ дӓ куштылгы ашкылтышвлӓ доно лапка векӹлӓ ашкедӹ.
Мӹнгеш ӹдӹрӓмӓш кок пакет кидӓ пӧртӹльӹ. Тенге гӹнят ваштар ӹлӹштӓшвлӓжӓт сагажок ылевӹ: нӹнӹм тӹдӹ пакетӹшкӹжӹ перегӓл шыралын. Подъездӹш пырымыкыжы, Нина почта йӓшӹк туре шагалальы дӓ тӹшецӹн газетвлӓм лыкты, вара нӹлӹмшӹ этажышты вӓрлӓнӹшӹ квартирӹшкӹжӹ кузыш. Токышты пырымыкы, пакетвлӓжӹм пӧкенӹш шӹндӹш, тӹшецӹн ваштар ӹлӹштӓшвлӓм, перегӓл лыктын, окня анзылнышы вазыш шыральы дӓ йӹрӓлтӓл маньы:
– Махань сӹлнӹ ылыда, техень сарывлӓ, вуйта тӓмдӓм кечӹ шыпшалын!
Ӹдӹрӓмӓш пакетвлӓжӹм охыремдӹш, вара, газетвлӓм погалтен, ӹшке кӹдежӹшкӹжӹ ашкедӹ.
– Мам вара сирӓт, шӓргӓл лӓкшӓш?– маньы ӹшкедурешӹжӹ.
Нина сек пӹтӓри ик газетӹм анжал лӓктӹ, вара весӹм кидӹш кычыш. Пӓшӓш ӱжмӹ гишӓн сирӹмӹ туре тӹшленрӓк лыдаш тӹнгӓльӹ, вет тӹдӹ тел гачеш пӓшӓм кӹчӓл анжаш шана. Кӹзӹт сад шытыр шайылан кодын, а тоны йӓрӓ шӹнзӹлтӓш сойтокат йыкырикӓрӓк, вет, хоть-ма гӹнят, йӓл лошты лимӹ дӓ пӓшӓлӓлмӓт шоэш. Лыдмы лошток маньы:
– Теве ик сауныш администратор-горничный келеш, эчежӹ вӹцлӹ кӓндӓкш иӓш якте ӹдӹрӓмӓшвлӓм нӓлӹнӓ манын сирӹмӹ. Йӹнгӹртен анжышаш гыце?
Нина, телефон докы миэн, газетӹштӹ анжыктымы номер доно йӹнгӹртӹш. Тӹштет тӧрӧк ответ шактыш.
– Алло, мӹнь тӓмдӓм колыштам,– пӱэргӹ юк маньы.
– Газетӹштӹ увертӓрӹмӓшӹм ужынамат, мӹнь пӓшӓ шотышты тӓ докыда йӹнгӹртем,– ӹдӹрӓмӓш пакыла попаш тӹнгӓльӹ.– Тӹштӹ администратор-горничный келеш манын сирӹмӹ.
– Ане, келеш. Маняр иӓш ылыда?– яды пӱэргӹ.
– Э-э, тӧрӧк иготым ядеш,– шаналтальы Нина.– Нӹнӹлӓн сӓмӹрӹкрӓк келеш, сӓй? Но нимат шӹлтӹде келесӹш.– Вӹцлӹ вӹц иӓш ылам.
– Пиш яра, пиш яра, мӓлӓннӓ лач пенсионер ӹдӹрӓмӓшвлӓ келӹт,– пӱэргӹн веселӓрӓк юкшы йонгалты.– Тенгежӹ, документвлӓдӓм сагада нӓлӹн, тишкӹ иргодым ирок ӹндекш цӓшеш толда. Адреснӓм сирӓлтӹдӓ.
Сирен пӹтӓрӹмӹкӹ, Нина телефон трубкам пиштӹш дӓ шанаш тӹнгӓльӹ:
– Маханьырак вара ылеш сауныжы? Ӹлӹмӹ курымыштем тӹштӹжӹ икӓнӓкӓт лиӓш вӓрештде ӹшкӓлӓ. Малын эче тӹшкӹжӹ пенсионер ӹдӹрӓмӓшвлӓм веле нӓлӹт? Ӧрмӓш велеш.
Вадеш пӓшӓ гӹц сек пӹтӓри Нинан Таня ӹдӹржӹ дӓ изиш варарак Коля пелӓшӹжӹ толевӹ. Нӹнӹм качкаш пукшымыкы, Таня ӹшке кӹдежӹшкӹжӹ телевизор анжаш ашкедӹ. Марыжы доно коктынок кухняшты шӹнзен кодмыкышты, Нина Колялан маньы:
– Мӹнь тагачы пӓшӓ шотышты ик саунышкы йӹнгӹртӹшӹм. Иргодым тӹшкӹ миӓш шӱдевӹ.
– Махань эче сауна? Махань пӓшӓ? Пенсиш лӓкмӹкӓт ӹнет кӓнӹ,–марыжы шӹмӓн маньы.
– Дӓ вет тонна ӹшкетӹн шӹнзӓш сылыкрак,– Нина пелештӹш.– Эчежӹ миӓш линӓм, седӹндон кеде ак ли.
– Ну, мам келесен кердӓм? Сауныш каштмаш уке, седӹндон нимахань кӓнгӓшӹмӓт пуэн ам мышты,– вӓтӹжӹн пулышышкыжы кидшӹм шӹмӓн пиштен, маньы Коля.– Кыце ӹштӹнет, тенге ӹштӹ.
Нина, ирок тонышывлӓжӹм пукшен, пӓшӓшкӹ ыжатыш, вара ӹшкежӓт йӓмдӹлӓлтӓш тӹнгӓльӹ. Халат кӹшӓнӹштӹжӹ адресӓн пумага лаштыкым кӹчӓл мон, изи сумкышкыжы шыральы дӓ корныш тӓрвӓнӹш.
Саунетӹм ӹдӹрӓмӓшлӓн шукок кӹчӓлӓш ӹш вӓрешт. Теве тӹдӹ – ик этажан изи агыл пӧрт, амаса кӱшнӹ яргата вывеска кечӓ. Пӓлӹдӹмӹ, нигынам уждымы вӓрӹш толмыжы гишӓн тыргыжланалын, Нина амасам олен пачы. Кӧргӹштӹ сӓмӹрӹк пӱэргӹм дӓ ӹлӓлшӹрӓк ӹдӹрӓмӓшӹм ужы.
– Пуры ирок лижӹ!– маньы толшы ӹдӹрӓмӓш.
– Пырыда-пырыда,– шактыш пӱэргӹн юкшы.– Тӓ, сӓй, Нина Ивановна ылыда.
– Ане, тӹдӹ,– Нина маньы.
– Мӹнь менеджер Александр Васильевич ылам,– пелештӹш пӱэргӹ дӓ вара кидшӹ доно тӹштӹшӹ ӹлӓлшӹ ӹдӹрӓмӓш векӹлӓ анжыктыш.– Тидӹ – тагачшы сменӹштӹ ровотайышы администратор-горничныйна Валентина Сергеевна.
Игот доно Нина гӹц изишеш когоракла кайшы ӹдӹрӓмӓш пурын йӹрӓлтӓльӹ.
– Кен колтымешкем, мӹнь цилӓжӓт анжыктал кодынем, вара кодшыжым Валентина Сергеевна ынгылдара,– маньы Александр Васильевичет дӓ, шайышташ тӹнгӓлмешкӹжӹ, Нинан документвлӓжӹм терген лӓктӹ.– Мӓмнӓн ти здаништӹ кок сауна улы. Ӓлдӓ сек пӹтӓри шалахайыштышым анжалына, тидӹ икшы сауна ылеш.
Тӹшкӹ пырымы годым Нинан сӹнзӓшкӹжӹ выргем сӓкӹмӹ вӓр тӹкнӹш. ™лнӹ яргата цӹреӓн нӧрӹдӹмӹ тапочкывлӓ шӹнзӓт. Кӧргӹшкӹрӓк пырымыкы, сӓмӹрӹк пӱэргӹ ынгылдарыш:
– Тидӹ – кӓнӹмӹ вӓр.
Тӹштетшӹ кавашты доно сӹрӹмӹ кок кого диван, нӹнӹ сага кужы стӧл кайыт, ваштарешӹштӹ – кого экранан телевизор.
– Ну ма, ӹнде тӹштӹ анжалына,– маньы Александр Васильевич дӓ кӓнӹмӹ кӹдеж гӹц пакыла тӓрвӓнӹш.– Теве тидӹ – бассейн, келгӹцшӹ – метрӓк-пелӓк, кыт дон торешӹжӹ – нӹл метр доно, вургымлашты – душвлӓ.
Нина цилӓжӓт тӹшлен анжа дӓ колыштеш. Техенетӹм ужаш вӓрештдеӓт, ӹшке семӹньжӹ шана:
– Кышты ӹне паралтытшы?
Тидӹн годым сӓмӹрӹк пӱэргӹ пу амаса векӹлӓ кидшӹ доно анжыктен пелештӹш:
– Теве тӹштӹ – паралтмы вӓр. Цецаш тӹдӹмӓт анжалына.
Сӓмӹрӹк пӱэргет амасам пачы. Кӧргӹштӹжӹ тазик, карка дӓ молат каевӹ. Шӹнзӹмӹ вӓр дӓ стенӓ ханга гӹц ӹштӹмӹ ылыт, седӹндон кымдыкеш сарын валгалтеш, но иктӹ Нинам ӧрӹктӓрӹш.
– Анжок, лач паралтмы вӓржӹ когоат агыл ылын,– шаналтальы ӹшкедурешӹжӹ.
– Ну ма, тиштӹ цилӓ анжыктышым, эче техень саунок вургымла велнӹ улы, тӹдӹм кокшы сауна манына. Тӹштӹ тӓлӓндӓ Валентина Сергеевна цилӓ анжыкта лиэш,– маньы Александр Васильевич.– Эче иктӹм шижтӓрем: мӓмнӓн тиштӹ охрана уке, иктӓ-ма тенге агыл гӹньӹ, лӹмӹн кнопкына улы, тӹдӹ сыравачвлӓ сага киӓ. Кнопкым темдӓлмӹкӹ, форман эдемвлӓ тӹнӓмок толын шошашлык ылыт. Эчежӹ видеокамерӹвлӓ улы.
Валентина Сергеевна пӓшӓм ӹштӹшӹ персоналын кӹдежеш кодын ыльы. Тӹдӹн докы мимӹкӹ, менеджер маньы:
– Ну, мӹлӓм кеӓш жеп. Цилӓжӓт анжыктышым. Нина Ивановна тек тагачы иктӓ вӹц цӓш яктерӓк сагада стажируялтеш. Вара тӹдӹм сменӹш шӹнденӓ.
– Яра-яра, цилӓ анжыктем дӓ тымдем,– пелештӹш тӹштӹшӹ ӹдӹрӓмӓшет.
Тӹ кӹдежеш коктынок кодмыкы, Валентина Сергеевна маньы:
– Эче кӹзӹтеш клиентвлӓ уке ылыт, седӹндон йӓрӓ жеп улы. Ӓлдӓ кыце дӓ мам ӹштӓш келмӹм ынгылдарен лӓктӓм. Мӹньӹм Валя манын кердӹдӓ.
– Мӹньӹмӓт лӹм доно попыда,– йӹрӓлтӓльӹ Нинаат.
Шая паштек шая кок ӹдӹрӓмӓшӹм лишӹлемдӹш. Паралтмы вӓрӹштӹ шокшым кыце когоэмдӓш дӓ изиэмдӓш, бассейнеш кодшы веньӹк ӹлӹштӓшвлӓм пылесос доно кыце погаш, каваштан диваным махань растворан вӹд доно ӹштӹлӓш келмӹ дӓ молы гишӓнӓт ынгылдарыш. Тидӹн лошты Нина ядде ӹш цӹтӹ:
– Малын, Валя, тишкӹжӹ, пӓшӓшкӹ, пенсионер ӹдӹрӓмӓшвлӓм веле нӓлӹт?
– Пенсионервлӓ докы клиентвлӓ ак пижедӹлеп манмы шанымаш доно тенге ӹштӓт, вет сауныжы сутка мычкы ровотая, а тишкӹжӹ махань эдем толькы ак тол! Молнам тиштӹ мӓ гӹцнӓ пасна погонан оролвлӓ линӹт гӹньӹ, кӹзӹт нӹнӹм теве тидет вашталтен,– Валентина Сергеевна сыравачвлӓ сага кишӹ кнопкет вӹкӹ анжыктыш.
Телефон юк йонгалтмыкы, Валентина Сергеевна йӹнгӹртӹшӹ доно шайышты дӓ вара маньы:
– Ик цӓш гӹц клиентвлӓ толыт, кыды сауныжым нӹнӹлӓн йӓмдӹленӓ вӓл? Икшӹжӹм ӓль кокшыжым? Яра, икшӹжӹ тек йӓмдӹ лиэш. Ну, давай, Нина, лешӓнгӹ ынгылдарымем семӹнь тӹдӹн газ котёлжым шӱдӹ коклы градусеш шӹнден коды, тек ик цӓш нӓрӹ ӹрен шӹнзӓ, вара толшывлӓлӓн паралташышты лач йӧнӓн лиэш. Э-э, веньӹквлӓ гишӓн попаш монденӓм. Теве тӹштӹ, шкафышты, тум веньӹквлӓ киӓт, кӱ нӹнӹм ядеш гӹньӹ, иктӹжӹ шӱдӹ тӓнгӓм стоя.
Иктӓ цӓш нӓрӹ эртӹмӹкӹ, сауныш ӹрвезӹвлӓ кымытын толын лӓктевӹ. Нӹнӹн йыд сменӹштӹ пӓшӓэш пыракангмы дӓ пӱжӓлтмӹ паштек мышкылтмышты дӓ паралтмышты шон. Тидӹжӹ шаяшты гӹц пӓлӹ ли. Эчежӹ вет сотыгечӹн ӓкшӓт шулдырак – ик цӓшеш – нӹлшӱдӹ тӓнгӓ, а вадеш гӹнь куд цӓш гӹц – кудшудӹ тӓнгӓ.
Кым ӹрвезӹн мышкылтмы дӓ паралтмы паштек сауныш эче икманяр партьы толын кеш. Вуйта нимахань проблемӓт ӹш лӓк, седӹндон Нина Валентина Сергеевналан вӹц цӓш шомы годымрак маньы:
– Ровотаяш лиэш, векӓт.
– Ну, тенгежӹ, Александр Васильевичлӓн йӹнгӹртӓш келеш.
Тенгелӓнлӓ Нина пӓшӓш нӓлӓлтӹ. Но вот Валентина Сергеевна тӹдӹлӓн тиштӹ ма лин кердмӹ гишӓн эче шукым ӹш шайышт. Малын ӹш шайышт? Векӓт, лӱдӹктен колтымыжы ӹш шо, вет техень пӓшӓшкӹ эдемӹм шанымы семӹньок мон ат шӹндӹ. Толшыжат ик-кок смена паштекок кен веле колта.
…Тагачы Нина у пӓшӓш кеӓш йӓмдӹлӓлтеш. Тӹдӹ вадеш шӹм цӓшӹн лач Валентина Сергеевнан сменӹжӹм вашталтышашлык. Тӹшкӹ миэн шомыкы, сменӹм сдаяш йӓмдӹлӓлтшӹ администратор-горничныет Нинам йӹрӓлтӓл вӓшли дӓ кен колтымешкӹжӹ ынгылдараш пижӹ:
– Икшӹ саунышты иктӓ нӹллӹ иӓшрӓквлӓ кок пӱэргӹ дӓ кок ӹдӹрӓмӓш ылыт, тӓ мары-вӓтӹвлӓ, тӓ уке, кӱ пӓлӓ? Нӹнӹ луаткок цӓш якте лиӓш оксам тӱленӹт. Вургымлаштышы кокшы саунышты – кымлы иӓшрӓк кок пӱэргӹ. Нӹнӓт шукердӹ веле агыл пыренӹт, тӱленӹтшӹ – лу цӓш якте лиӓш. Йыдымжы ӧлицӓш лӓкмӹ амасажым виш ит шӹнзӹктӹ. Питӹрӹшашлык ана ыл гӹнят, мӹнь сойток сыралем, толын лӓкшӹвлӓ тӱнӹшы йӹнгӹрӹм темдӓл кердӹт. Йӱкшӹлӓ моло кайыт гӹньӹ, нӹнӹлӓн кынамжы амат пач. Пӓшӓ доно карангмет годымжы ти кӹдежӹн амасажымат сыралал шӹндӹ, вет тиштӹ оксаат, молат улы. Махань эдемвлӓ тишкӹ каштыт, ана пӓлӹ вет. Ну вот, теве газетвлӓ киӓт, пӓшӓ лӓкмешкӹ, нӹнӹм лыдын шӹнзӹлдӓл кердӓт,– стӧл вӹкӹлӓ анжыкта.– Эчежӹ теве ти тетрадеш звоньышывлӓн заявкыштым сирӓш ит монды, махань кечеш, маняр цӓшеш толаш шанымыштым пӓлемдӹмӹлӓ. Ну ма, тенгежӹ, мӹнь кешӹм, ядмаш лӓктеш гӹньӹ, йӹнгӹртӹ. Э-э, тонышы телефон номеремжӹм сирӓлӓл шӹндемӓ! Омемӹм моло кӹрмӹ гӹц ит лӱд, вет техень пӓшӓштӹ тамахань ядмашат вычыдымын лӓктӹн кердеш.
Валентина Сергеевна кен колтымыкы, Нина, стӧл докы лишкӹрӓк шӹнзӹн, кидӹш газетвлӓм нӓльӹ, нӹнӹм шӓргӓлмӹкӹ, маньы:
– Мам тиштӹ лыдашыжы? Рекламан газетвлӓ веле ылытыш.
Тидӹн лошты телефон юк йонгалты.
– Тӓмдӓм колыштам,– маньы Нина.
– Кӹзӹт мӓ саунышкы тӓнгвлӓэм доно шачмы кечем пӓлемдӓш толненӓ,– шактыш ӹдӹр юк.– Йӓрӓ вӓр улы ма?
– Уке. Кымылда улы гӹньӹ, лу цӓшӹн ик саунынажы йӓрӓ лишӓшлык,– Нина звоньышылан ынгылдарыш.
– Мӓлӓннӓ кӹзӹток келеш ыльы. Вӓр уке гӹньӹ, вес вӓре кӹчӓлӓш вӓрештеш,– маньы йӹнгӹртӹшет.
Икшӹ саунышты мӱгӹрӹшӹ телевизор юк Нина докок рӹшкӓлтеш. Векӓт, тӹштӹшӹ кӹдӓлӓш иготан кок мыжырет телевизор паштек мыра дӓ кушта, ваштылмышты дӓ сӹгӹрӓл колтымышты веле раскыдынок йонгалтеш.
Цилӓ векӹлӓ яжон ужаш манын, Нина кӹдеж амасажым йолток пачын. Теве кокшы саунын амасажы «кочыр-рик» мыралтыш. Ӹдӹрӓмӓш тӹшкӹлӓ анжальы дӓ кӹдежшӹ докыла лишемшӹ пӱэргӹм ужы. Тӹдет кӹдӓлешӹжӹ шӹргӹмсавыцым веле пӹтӹрӓлӹн.
– Малын коридор мычкы выргемдеок кыргышталыда?– яды ӹдӹрӓмӓш.
– Мӹнь выртеш веле лӓктӹндӓльӹм. Мӓлӓннӓ, пӓледӓ, кок ӹдӹр келеш,– пӱэргет маньы.
– Кышты мӹнь нӹнӹжӹм тӓлӓндӓ моам?– Нина, мам ӹштӓш ӧрӹн, пелештӹш.
– Кыце кышты? Тӓжӹ тиштӹ у эдем ылыда тама? Администратор- горничныйвлӓ хоть-кынамат мӓлӓннӓ нӹнӹм ӱжӓш палшенӹт. Ма, такеш гыце мӓ тишты лу цӓш якте шӹнзӹлтӓш тӹнгӓлӹнӓ?– пӱэргӹ тӹшец карангаш акат шаны.
Мам ӹштӓш ӧршӹ Нина газетвлӓ вӹкӹ анжальы дӓ, нӹнӹм кидӹш кычен, пӱэргӹлӓн виктӓлтӹш:
– Теве – увертӓрӹмӓшӓн газетвлӓ, сотовый телефонда улы, шанем, седӹндон кедӓ ӹшке вӓрӹшкӹдӓ дӓ тӹшецӹн йӹнгӹртӹдӓ!– Нина пачкатанрак пелештӹде ӹш цӹтӹ.
Пӱэргӹ, ик кидшӹ доно кӹдӓлӹштӹшӹ шӹргӹмсавыцым, весӹ доно газетвлӓм кычен, вургымла векӹлӓ ашкедӹ. Аражы яммыкы, Нина Валентина Сергеевналан йӹнгӹртӓш шанен пиштӹш. Тӹдет трубкам тӧрӧк нӓльӹ.
– Валя, тӓ годымдаок толшы кокшы сауныштышы пӱэргӹвлӓ ӹдӹрвлӓм ӱжӓш ядыт,– маньы Нина.
– Ӹдӹрвлӓм ядыт, манат?– пелештӹш тӹдет.– Техеньӹ лин кердеш манын, мӹнь вет лӹмӹн анзыкет увертӓрӹмӓшӓн газетвлӓм пиштӹшӹм. Ти газетвлӓм пуэмӓ, тек ӹшке йӹнгӹртӓт. Нимахань шот ак лӓк гӹньӹ, стӧл кӧргӹштӹ кишӹ якшар блокнотем кӹчӓл мо. Тӹштӹ сутенёр Русланын телефонжы улы. Кымшы лаштыкым шӓргӓл дӓ «Р» буква паштек цифрвлӓм анжал. Тидӹ – телефон номержӹ. Тӹдӹн докы йӹнгӹртӹ. Ти клиентвлӓлӓн Руслан гач ӹдӹрвлӓм канден мыштет гӹньӹ, тӹлӓтӓт изиш окса вӓрештеш.
– Мӹлӓм нимахань оксаат ак кел. Малын, Валя, тенге лин кердмӹжӹ гишӓн стажировкым эртӹмем годымок шӹц шижтӓрӹ?– Нина ӧпкӓленрӓк маньы.
– Эх, Нина, техень пӓшӓштӹ тамахань вычыдымат лиӓлтеш. Теве пӓшӓм ӹштен анжет дӓ цилӓ ӹшкеок ужат. Ти пӱэргӹвлӓлӓн ӹдӹрвлӓ келӹт гӹньӹ, нӹнӹ саунышкыжат тидӹм шаненок толыныт, седӹндон, момешкӹштӹ, тӹньӹм ядмашышты доно нератым ӹштӓт.
Тидӹн лошты кокшы саунын амасажы угӹц пачылты, тӹштӹ газет кидӓн тӹ пӱэргет кайы. Нина докы лишемӹн, газетвлӓм мӹнгеш виктӓлтӹш дӓ маньы:
– Нимахань шот ӹш лӓк, тӓ ӹшкеок мӓлӓннӓ заказыдай.
– Яра, путаен анжем, толькы тӓ коридор мычкы мӹнгеш-анеш выргем гӹц пасна идӓ кыргыжтал,– Нина пелештӹш.
Пӱэргӹ кемӹкӹ, ӹдӹрӓмӓш стӧл кӧргӹштӹ Валентина Сергеевнан попымы якшар блокнотшым кӹчӓл мо, ӹшкӹмжӹн вуй йӹржӹ шанымаш пӧрдеш:
– Шонгы вуеш сутенёрвлӓ доно моло кӹлӹм кычаш вӓрештеш гыце? Эх, ӹлӹмӓшӹжӓт: уждымым ужат, колдымым колат.
Якшар блокнотым кӹчӓл момыкы, Нина Руслан манметлӓн йӹнгӹртӹш. Тӹдет тенге маньы:
– Сауныш кок ӹдӹр келеш, маныда? Маханьыракым вара ядыт? Ош ӱпӓнӹм, шимӓнӹм ӓль хӹрӓшӓнӹм?
– Ам пӓлӹ.
– Ӹне вӹцкӹж ӓль кӹжгӹрӓк ӹдӹр келеш?
– Техеньӹм попыделыт.
– Тенгежӹ, каеш, хоть-маханят яра. Вӹц минутышты ӹдӹрвлӓ сауныштыда лит,– шаяжым кашартыш Руслан манмы пӱэргет.
Попымыжы семӹньок, икманяр жепӹштӹ сауныш пырымы амаса пачылты, дӓ тӹштӹ кок ӹдӹр кайы. Толшывлӓэт, у администратор-горничныетӹм ужын, пӓлӹмӹ эдем моло агыл, сӓй, маншыла, Нина вӹкӹ тусаренрӓк анжалевӹ. Вара ик ӹдӹржӹ яды:
– Кыды сауныштыжы вычат: икшӹштӹ ӓль кокшышты?
Ядмашышты гӹц каеш: нӹнӹ тиштӹ пӹтӓриш гӓнӓ веле агылеп. Лицӓштӹм поханя семӹнь чиӓлтен шӹндӹшӹ мытык юбкан ӹдӹрвлӓлӓн Нина кидшӹ доно вургымла векӹлӓ анжыктен маньы:
– Тӹштӹ, кокшышты, вычат.
Тиштӹ техень картинӹм ужмы паштек Нина пӓлӓ: ти саунышты пакылажы ик кечӹмӓт пӓшӓм ӹштӓш ак тӹнгӓл. Но ти сменӹм тӹдӹлӓн мычаш якте шокташ сойтокат вӓрештеш.
Пӓшӓ лошты жеп пӹсӹнрӓк эртӓ, седӹндон ӹдӹрӓмӓш шкафым пачы дӓ тӹштӹшӹ шӹргӹмсавыц дон простыньвлӓм тӧрлӓтӹл опташ тӹнгӓльӹ. Нӹнӹ мышмы ылыт гӹнят, кыды-тидӹжӹ ирелӓок ӹш чучеп, седӹндон техеньӹвлӓжӹм мышмы машинӓшкӹ шуш дӓ тӹдӹм чӱктӹш. Вара ӹшке кӹдежӹшкӹжӹ ашкедӹ.
Тенгелӓнлӓ тӹштӹ дӓ тиштӹ йыштылмы лошток кок цӓш нӓрӓт эртен кеш. Кӹдежӹштӹжӹ кӓнӓлтӓлӓш шӹцмӹкӹ, Нина изиш нерӓлтӹмӹ ганьы лин ыльы, но тидӹн годым кокшы саунетӹн амасажы пачылты, тӹшецӹн, ваштыл-попен, кок пӱэргӹ докы ӱжӹктӹмӹ ӹдӹрвлӓэт лӓктевӹ дӓ, кен колтымешкӹштӹ, администратор-горничный докы лишемевӹ. Иктӹжӹ кидешӹжӹ оксам кычен. Тӹдӹ Ниналан виктӓлтӹмӹжӹ годым маньы:
– Тидӹ – тӓлӓндӓ.
Ӹдӹрӓмӓш ӧрӹн дӓ пачкатанрак яды:
– Мӹлӓнемжӹ малын? Пиштӹдӓ кӹшӓнӹшкӹдӓ ӹшке оксадам!
– Мӓлӓннӓ тенге ӹштӓш ак яры, ана пу гӹньӹ, Руслан вырса лиэш,– оксам кидӹштӹ кычышы ӹдӹрет кокшӱдӹ тӓнгӓм стӧл вӹкӹ пиштӹш, дӓ коктын амаса докы талашалевӹ.
Нина паштекӹштӹ анжалаш окня докок лишемӹ. Нӹнетӹм, каеш, уже хозашты машинӓ доно нӓлӓш толын.
– Эх, тӓ, сӓмӹрӹк ӹдӹрвлӓ, мам ӹштӹлӹдӓ, техень ӹлӹмӓшӹшкӹжӹ кыце шонда? Вет тӓмдӓнӓт ӓтя-ӓвӓдӓ, лишӹл родньыквлӓдӓ улы. Махань пӓшӓм ӹштӹмӹдӓ гишӓнжӹ нӹнӹ пӓлӓт ма? – кужынрак шӱлӓлтен маньы ӹшкедурешӹжӹ ӹдӹрӓмӓш.
Шанымашыжым мышмы машинӓн царгатан мыралтымы юкшы лоэштӓрӹш.
– Э-э, мышкаш цӓрнӹш, виднӹ,– маньы.
Машинӓ гӹцӹн шӹргӹмсавыц дон простыньвлӓм лыктын, нӹнӹм лӹмӹн ӹштӹмӹ вӓрӹш кошташ сӓкӓлтӹш, вара пӓшӓ кӹдежӹшкӹжӹ ашкедӹ.
Ӹдӹрвлӓштӹ кен колтымы паштек икманяр жепӹштӹ, таксим ӱжӹктен, кокшы сауныштышы пӱэргӹвлӓэтӓт тӹшецӹн кевӹ. Кӱ пӓлӓ, ӓнят, нӹнӹ семняӓн ылыт дӓ ӹнде пелӓшӹштӹ докы талашат…
Нина, вӹкӹжӹ халатым, кидеш резин перчаткым чиэн, охыр ылшы кокшы сауныш мышкаш пырыш. Цилӓ вӓре мышкеш дӓ кукшемдӓ, но техень эдемвлӓ паштекет тӹвӹлӓйӹмӓш кӧргӹштӹжӹ тамахань йӹрнӹмӓш кымылым веле шачыкта. Тӹштӹ пӓшӓм пӹтӓрӹмӹкӹ, Нина угӹц амасаш йӹнгӹртӹмӹ юкым кольы дӓ тӹшкӹлӓ талашальы. Пачмыкы, кым ӹдӹрӹм ужы.
– Сауныда йӓрӓ ма?– яды иктӹжӹ.
– Кокшы сауна йӓрӓ ылеш,– Нина маньы дӓ ӹшке кӹдежшӹ докыла анжыктыш.– Сек пӹтӓри тӹшкӹлӓ эртӹдӓ. Вара маняр цӓшеш пырынедӓ?
– Кок цӓш нӓрӹ линенӓ,– маньы тӹ ӹдӹрок.
– Тенгежӹ, тӓ гӹцдӓ – тӹжем кокшӱдӹ тӓнгӓ.
Оксам тӱлӹмӹкӹ, толшы ӹдӹрвлӓ вургымла велнӹшӹ кокшы сауныш пыревӹ. Тидӹн годым Нина тыргыжланен шаналтыш:
– Ӹнде нинӹжӹ ӹшке докышты ӹрвезӹвлӓм ӱжӹктӓш веле ӹнжӹштӹ тӹнгӓлеп, кышты вара мӹнь нӹнӹм кӹчӓл моам?
Тидӹн лошты эче Валентина Сергеевнан сменӹжӹ годымок толшы нӹллӹ иӓшрӓк кок мыжыр ылмы икшӹ сауныштышы амаса вецӹн ӹдӹрӓмӓш юк йонгалты:
– Кышты ылыда, палшыдай, скорыйым ӱжӓш келеш!
– Ма тӹштӹ лин?– Нина тыргыжланен яды.
– Сагана ылшы пӱэргӹ бассейн лишӓн яклештӹн дӓ кенвацмашеш шамым ямден,– маньы выргемдӹмӹ ӹдӹрӓмӓшет.
– Яра-яра, цецаш скорыйым ӱжӹктем,– Нина талашальы. Звоньымы паштек тӹдӹ кӹдежӹштӹшӹ аптечкым кидӹш нӓльӹ дӓ шалахай велнӹшӹ саунышкет пӹсӹн пырыш. Бассейн пылдыр сага нӹллӹ иӓш кытларак пӱэргӹ киӓ. Тӹдӹн вуйжым вес ӹдӹрӓмӓшет вургымла кидшӹ доно кычен дӓ изиш кӱшкӹрӓк лӱктӓлӹн попа:
– Женя, яратымем, ма лиц?!
Тидӹн годым нӹнӹ докы лишемшӹ Нина пӱэргӹн вуйжым кычышы ӹдӹрӓмӓшлӓн маньы:
– Цецаш нерӹшкӹжӹ нашатырьан ваткым тышкалтенӓ.
Попымы юкым колын, кымык ылшы вуйжым ӹдӹрӓмӓш Нина векӹлӓ сӓрӓльӹ дӓ вычыдымын юкшы шактыш:
– Нина Ивановна, тӓ ылыда? Мам тиштӹжӹ ӹштедӓ?
Нина молнамшы начальникшӹм, кафе вуйлатышы Марина Павловнам, пӓлӹш.
– Мӹнь тиштӹ, Марина Павловна, пӓшӓм ӹштем, администратор-горничный ылам,– ӱштӹнрӓк маньы Нина.– Но кӹзӹт ядмашвлӓм тӓрвӓтӓш агыл, а тӓнглӓндӓ палшыкым пуаш келеш. Ӓлдӓ, мӹлӓм палшалтыда!
Скорыет йӹле толын шо. Врач дон медсестра тӹштӹ лимӹкӹштӹ, Нина ӹшке кӹдежӹшкӹжӹ кеӓш тӓрвӓнӹш, вет вес сауныштат эдемвлӓ ылыт, пӓшӓ кӹдеж гӹц шукы жепеш карангаш як яры. Каваштан диванвлӓ сага ылшы кужы стӧл туре эртӹмӹжӹ годым Нина тӹдӹн вӹлнӹ шӹнзӹшӹ кым охыр ош ӓрӓкӓ ямдарым дӓ эче кок пачдымым ужы.
– Э-э, нӹлӹтӹн яжонок колтенӹт, виднӹ,– шаналтальы ӹшкедурешӹжӹ.
Кенвацшы пӱэргӹм врач шамышкы канден кердӹ, вуй вимжӹ цӹтӹрнӓлтӹн манын, тӹдӹм больницӹш шыпштен кевӹ. Саунеш кодшы кок ӹдӹрӓмӓш дӓ вес пӱэргет, луаткок цӓшӹм вычен шоктыдеок, выргемӹштӹм чиӓш тӹнгӓлевӹ. Нӹнӹн тӹшецӹн кеӓш тӓрвӓнӹмӹштӹм ужын, Нина цӓшӹм анжальы дӓ ӹшкедурешӹжӹ шаналтыш:
– Кӹзӹт луатик цӓш веле, а нӹнӹ луаткокты якте тӱленӹт манын, Валентина Сергеевна попыш вет. Техень годымжы мам ӹштӓт – амат пӓлӹ? Кудшӱдӹ тӓнгӓм пӧртӹлтӓш келеш, сӓй?
Администратор-горничныет, нӹнӹ докы лишемӓш манын, вӓржӹ гӹц тӓрвӓнен ыльы, но тигытлашты анзыкыжы кафе вуйлатышет, Марина Павловна, ӹшкеок толын шагальы дӓ пелештӹш:
– Нина Ивановна, сарвален ядам, тиштӹ ма ылмы гишӓн иктӹлӓнӓт идӓ попы, марем докы техень увер шомы гӹц лӱдӓм, тенгеок пӓшӓштӹшӹвлӓ пӓлен нӓлмӹкӓт, яжо агыл.
– Яра-яра, мӹньжӹ иктӹлӓнӓт ам шайышт, но, Марина Павловна, техень халык шаям яжон пӓледӓ вет: вуйжырым мешӓкеш ат шӹлтӹ, манытыш,– Нина маньы.– Тырхалда, сауна гӹц ик цӓш анзыц кедӓ, седӹндон тӓлӓндӓ кудшӱдӹ тӓнгӓм мӹнгеш пӧртӹлтем.
– Ак кел, Нина Ивановна, тек тӹдӹ тӓлӓндӓ лиэш,– йӹрӓлтӓш цацышыла маньы кафе вуйлатышет.
– Уке, Марина Павловна, мӹлӓм йӓл окса ак кел, а тӓлӓндӓ тевеш Женя лӹмӓндӓ докы больницӹш передачым моло нӓлӹн кеӓшдӓ лачеш веле лиэш,– тенге манын, Нина ӹдӹрӓмӓшӹн куртка кӹшӓнӹшкӹжӹ оксам силомок шыральы дӓ привайыш.– Цеверӹн!
Кешӹвлӓ паштек тӹдӹ эчеӓт вӹкӹжӹ халатым дӓ кидешӹжӹ резин перчаткым чиш, вара икшӹ сауныштет пӓшӓшкӹ пижӹ.
Луаткок цӓш шомы кытлан кокшы сауныштышы кым ӹдӹрӓт, таксим ӱжӹктен, токышты кыдальы. Нӹнӹн кемӹштӹ годым ӹдӹрӓмӓш шаналтальы:
– Яра-хоть нинӹжӹ нимахань уты шытырым ӹш лыкеп, шот донок ӹшке жепӹштӹштӹ мышкылтевӹ дӓ паралтевӹ.
Иктӓт уке лимӹкӹ, Валентина Сергеевнан шаяжым ӓшӹндӓрӓлӹн, Нина амасам тӹкӹлӹш.
…Тӱнӹ валгалтмаш у кечӹ тӹнгӓлӓлтмӹ гишӓн шижтӓрӹш. Ирок якте угӹц амасаш йӹнгӹртӹшӹ иктӓт ӹш ли. Нина вес сменеш толшы ӹдӹрӓмӓшӹм вычаш тӹнгӓльӹ. Тӹдет шӹм цӓшеш толын шо.
– Мӹнь Светлана Андреевна ылам,– маньы ӹдӹрӓмӓш.– Ну, кыцерӓк вара икшӹ сменӹдӓ эртӹш?
– Уке, тидӹ мӹлӓм ярал пӓшӓ агыл,– пелештӹш Нина.
– Мӹньлыкемӓт агыл дӓ, но тиштӹ изиш шалахай оксам ӹштен нӓлӓш йӧн улы, вет мӓ эргӹм доно коктынок ӹленӓ, тӹдӹ нигыштат пӓшӓм ак ӹштӹ, мӹньӹн шӱштӹ веле шӹнзӓ.
Светлана Андреевна дон Нина сек пӹтӓри кассышты ылшы оксам иквӓреш терген лӓктевӹ дӓ, ведомостьыш сирен, кид пӓлӹштӹм шӹндевӹ. Тидӹн годым ӹдӹрӓмӓшӹн сӹнзӓшкӹжӹ стӧл вӹлнӹ кишӹ кокшӱдӹ тӓнгӓ тӹкнӹш дӓ тӹдӹ Нина гӹц яды:
– Тидӹжӹ махань окса?
– Пӱэргӹвлӓ докы ӱжӹктӹмӹ ӹдӹрвлӓ пиштен коденӹт.
– Тенгежӹ, тидӹ тӓмдӓн ылеш, кӹшӓнӹшкӹдӓ пиштӹдок.
– Мӹлӓм нимахань оксаат ак кел, тенге толшы окса йӹрнӹктӹмӓшӹм шачыкта. Ну, цеверӹн, мӹнь токына ашкедӓм.
– А Александр Васильевичлӓнжӹ мам маншаш? Тӹдӹ вет ӹндекш цӓшеш толеш.
– Мӹнь тӹдӹн докы ӹшкеок йӹнгӹртем,– маньы Нина Светлана Андреевналан дӓ техень вӓр гӹц пӹсӹнрӓк, шайыкыла сӓрнӓл анжалдеок кен колтымыжы шо, дӓ тӹдӹ тенгеок ӹштӹш…

Запись опубликована в рубрике Uncategorized. Добавьте в закладки постоянную ссылку.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s