Кыце «Сӹлнӹшая и» эртӓ?

Кыце Руш Элышты кымдан муссируымы «Сӹлнӹшая и» Мары Элышты дӓ Кырык дӓ Кожласирӹштӹ эртӓ? Маняр марла сирӹмӹ книгӓ тене лыдшывлӓ якте корныжым мон дӓ моэш? Вет ин мычаш яктежӹ эче кок тӹлзӹ нӓрӹ улы. Кырык марла тене маняр книгӓ лӓктӹн? Ӓль марла книгӓвлӓм лыкмы вӓреш, оксам Украинышты вырсым эртӓрӹмӓш дӓ Сириштӹ бомбуйымы ракетывлӓм лыкмашкы цилӓ колтымы дӓ колтат? «Сӹлнӹшая и» лӹм доно Кырык дӓ Кожласирӹштӹ махань мероприятивлӓм эртӓрӹмӹ дӓ эртӓрӹмӹ лиэш, ӓль угӹц, Мары Элышты ма литературы доно кӹлдӓлтӹн, фейкыш (алталымашыш) сӓрнӓлтеш?

Тенге гӹнят, Суомиштӹ, Хельсинкиштӹ «Сӹлнӹшая и» агыл гӹнят, октябрьын таманяр мероприяти эртӓрӓлтӹн, кышты мары литература гишӓн шая кен, дӓ марла лыдышвлӓм лыдмы. Тенге 13-шы октябрьын Kasi (Кӓндӓкш) клубышты Мары вады эртен, кышты шӹмлӹзӹ Юлия Куприна кырык мары культурыштыш кӹзӹтшӹ ситуаци гишӓн шайыштын, Раиса Саметова Петербургыштыш марынвлӓн организаштштӹ гишӓн шаям кычен, Хельсинки университетӹн шӹмлӹзӹжӹ Мерья Пиккарайнен кыце Мары Элыш кӓнгӹжӹм йӹлмӹ экспедициш каштын толын, хытырен. Поэзи монгырым Валери Микорын лыдышвлӓжӹ сӹлнештӓренӹт, кыды лыдышвлӓжӹм лыдмы годым Андрей Эшпайын семвлӓжӹм кычылтын. Вады пиш пышкыдын, яжон эртен, келгӹ шанымашывлӓм коден. Ти вадым эртӓрӓш манын идейыжым Аннели Ойала пуэн.

Тидӹ гӹц пасна Хельсинкиштӹ 22-25 октябрь лошты Книгӓ Йӓрмингӓ эртен, кышты тене, Руш Элыштыш литературы тема ылынат, финн-угр сирӹзӹвлӓӓт хына семӹнь ылыныт, нӹнӹжӹ Мары Эл, Удмурти, Коми дӓ Ямал-Ненеци гӹц толыныт. Республикына гӹц Семенова ылын, кыдылан тене Ксатрен Ушемӹн Сӹлнӹшаян премижӹм пумы. Премин суммыжы 2000 евро. Техень премим эче сӓмӹрӹк удмурт поэт Богдан Анфиногеновлан пумы. Йӓрмингӓштӹ махань-шон тӹрлӹ (шукы йиш) программы ылын, кышты, шамаклан Хельсинкиштӹ ӹлӹшӹ алык мары сирӹзӹ Светлана Хӓмӓлӓйнен (Элембаева) дон Валери Микор ӹшке пӓшӓвлӓштӹм лыдыныт. Йӓрмингӓн тӹнг темыжы руш сӹлнӹшая ылынат, тенге тӹшкӹ, шамаклан, Людмила Улицкая, Андрей Битов, Валери Попов, Ильдар Абузяров, Борис Акунин дӓ вес авторвлӓӓт ӱжмӹ ылыныт.

Йӓрмингӓн программыжы гишӓн тиштӹ пӓлен нӓлӓш лиэш:

http://www.m.helsinginkirjamessut.fi/

«Цикмӓ» журналын редакторжы

Запись опубликована в рубрике Uncategorized. Добавьте в закладки постоянную ссылку.

1 отзыв на “Кыце «Сӹлнӹшая и» эртӓ?

  1. хына:

    Мары вады — яжо проект!

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s