Йыл вӹлнӹш изи халаш салтак толын

Йыл вӹлнӹш изи халаш салтак толын

цинк коропеш—

изи халавлӓштӹ солаштыш гань

цилӓн икӹжӓк иктӹм пӓлӓтӓт

тайымы годым шукы халык погыныш

шӹгерлӓштӹ военкомат комиссар

халанан ик эргӹжӹ геройла вуйжым пиштен

манын увертӓрӹш, цилӓ тайымаш роскотвлӓм

военкомат тӱлӓ — келесӹш

ам пӓлӹ шаяжылан шукынок вӓл ӹнянӹш

вара оркестр трауран семӹм шактыш

короп лишнӹ иктӓ нӹллӹ и кытлаш

шим савыцан ӹдӹрӓмӓш шалгыш

сӹнзӓвӹдшӹм ош нерсавыц донжы ӹштӹн…

Салтакым рокыш валтевӹ

мӱдевӹ хӹрестӹм шагалтевӹ

салтак вӹлӓн хала садывичӹвлӓштӹ

погымы августаш яргата

пеледӹшвлӓм пиштевӹ

варажы халык изин-олен шӓлӓнӹш

оркестр ойхан семжӹм шактен пӹтӓрӹш

музыкант ик пӱэргӹлӓн:

«Ти ӓрнян кокшы салтаклан шактенӓ,

сусу семвлӓ вӓреш, трауран музыкым

салтаквлӓлӓннӓ шакташ жеп ӹнде шон ма?»

келесӓльӹ дӓ сигаретшӹм келгӹн шыпшыл

симсы шӹкшӹм шӱлӓлтен лыкты.

Лишӹл садывичӹвлӓ гӹц

августын кӱшӹ олмавлӓн пыш шӓрлен.

 

Тагышты мӹндӹрнӹ Лугадони гӹц

колтымы СМС увер:

 

Äвиэм, шергӓкӓнем!

Мӓмнӓн тиштӹ цилӓ яжо

сагаэм служышышывлӓ доно

тӓнгвлӓ гань ӹленӓ

кӹзӹт тиштӹ мӓ донна ученивлӓ кеӓт

тӹнь верцем когонжок ит ойхыры

шанем — цилӓ яжон эртӓ

дӓ шӹжӹм вӓшлинӓт кердӹнӓ

яжо стӧлӹм левед, айом эртӓренӓ…

 

Фейсбукышты:

 

Салтакын коропшы сага шалгышы

шим савыцан ӹдӹрӓмӓш иктӓ кок ӓрняштӹ:

— ӓвиэм, мам ти изи халашты ӹштӓшӹжӹ?

— махань пӓшӓш кеӓшӹжӹ?

— кышты ти пӓшӓжӹм моашыжы?

— сӓмӹрӹкӹнок ма ӓрӓкӓ йӱн

наркотам кычылт колаш?

— мӹньӹн эче колымем ак шо!

— мӹньӹн ӹлӹмем шоэш!

— мӹнь тӹлӓнет иктӓ кечӹн кого сусум кандынем

— оксаэм лиэш гӹнь, тонна ремонтым ӹштӹнем

ӹндекш квадрат метр кыташ

ватерӹжӹ вӹкӹ кид лыпшал анжыктен

шим савыцан ӹдӹрӓмашет шайыштеш

— тӹнӓм мӹньӹнӓт изи кӹдежем ӓнят лиэш ыльы

— тӹдӹ, тевеш тиштӹ амален — диван вӹкӹ

ӹдӹрӓмашет кидшӹм шалалта

— мӓэтшӹ вет тӱгӹжӓт лачокат тӱгӹ каштына

— телӹмжӹ гӹнь лӓктӓш келеш гӹнят, лӓкмет ак шо

— ой, Йылет, кого йогет, ӱштӹ мардежет

тӹ монгыр гӹц пуалешӓт — цӹтӹрӓл колтет

— тӹдӹ яжо туалетӹм ӹштӹнежӹ ыльы

— яратымы ӹдӹржӹм мӹлӓнем анжыкташ

косир мӓшинӓэш кыдал толнежӹ ыльы.

— тагышты интернетӹштӹ армиш контрактникеш

кет гӹнь ик ишток шукы оксам ӹштӓш лиэш

манмы гишӓн пӓлен нӓлын дӓ:

— ӓвиэм, ӹшке тӹлнӹмӓшвлӓэм (мечта) ӹлӹмӓшӹш пырташ

армиш кем манын увертӓрӹш

ӹлӹмӓшнӓм вашталташ манын

билетӹм тагыш нӓлӹн торцынна лӓктӹн кеш

— пеле тылык кушкын, ӓтядӹмӹ,

седӹндоно ӓтя гӹц моло ядаш ак кел

— ӹнде тевеш, пӧртӹлӹн, кого сусу вӓреш

цинк коропеш ойхым канден…

Шим савыцан ӹдӹрӓмӓш шайыштын дӓ

ойхыжым шӧрӓш цацен, сӹнзӓжӹм

ош нер савыц доно ӹштӹн

— Äвиэм, шергӓкӓнем!

— мӓмнӓн тиштӹ цилӓ яжо

— сагаэм служышышывлӓ доно

— тӓнгвлӓ гань ӹленӓ

— тенге мӓ туан ӓтямӱлӓндӹлӓн служенӓ

манмы эсемескывлӓм колтылын.

— тенге мӹньӹм ладнангдарен. Варажы…

— варажы трӱк нимахань уверӓт торцынжы уке…

— варажы трӱкок…. военкомат гӹц офицер тонна

— эргӹдӓ токына толын манын увертарӹш

— толашыжы веле коропеш толын…

— кӱлӓн ти Крымжы, ти Донбассшы?

— эргемлӓн ма? Мӹлӓнем ма?

— кыце ӹнде пакылажы мӹлӓнем ӹлӓшӹжӹ?

— тӹ тӧрӓвлӓн, кыдывлӓ вырсывлӓм тӹнгӓлӹт

эргӹвлӓштӹ пульывлӓ дон снарядвлӓ лӹвӓлны колат?

А сӓндӓлыкы:н пропаганды машинӓжӹ

токышты пӧртӹлшӹ салтаквлӓ гишӓн

отпускыш Украиныш кен

коленыт манын ынгылдарен

отпускниквлӓн шотышты шукеммӹ семӹнь

нӹнӹлӓн «Груз 200» кодым пумы.

 

Тагышты Лугадоништӹ:

 

— Ой… ӓвиэм… шергӓкӓнем!

— ӓтиэм…. ма лим?

— ам тырхы… каршта… йылата…

— тӹлем…

— ӓвиэм… ак шо… колымем…

 

 

Валери Микор

Запись опубликована в рубрике Uncategorized. Добавьте в закладки постоянную ссылку.

2 отзыва на “Йыл вӹлнӹш изи халаш салтак толын

  1. Пӹл:

    Ти эргӹн фамилижӹ Туманов агыл? Лӹмжӹм ам пӓлӹ, но иӓк-пелӓк эртӹш векӓт кынам видеом youtube.com-ышты ужым. Чываксар гӹц Цикмӓш йори ик мары толынат Тумановын родньыквлӓм ядыштын: кыце дӓ кышак колен тӹ сӓмӹрӹк… Родняжы лӱдӹктен шӹндӹмлӓ чучы — воксьок ӹнежӹ попы ыльы, но сойток келесӹш: «Пуштыныт…» ФБ-н «Кырык марын» группыштат тӹнӓм тидӹ гишӓн тӓгӱ сирӓлтӹш, но шукынжок ик йукымат ӹш лыкеп — нӹнӹмӓт тамахань «спецвлӓ» лӱдӹктенӹт вӓл?…

  2. Пуры лижӹ Пӹл.

    Кӹзӹтшӹ Руш Элыштыш изи халавлӓштӹ тамаат лиӓлтеш. Крым дон Ирвел Украиным Руш Эл доно оккупируйымы паштек, кыды салтакшы цинк коропеш токыжы толын, кыдыжы курымеш тагышты мӹндӹрнӹ лувлӓжӹм рокыш пиштен. Миллиардвлӓ доно вырсышты шавӹмӹ окса вӓреш, Руш Эл ти оксм изи халавлӓн инфраструктурым виӓнгдӹмӓшкӹ колта ыльы ылгецы.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s