Дейвид Герберт Лоренс (Лоуренс; David Herbert Lawrence; 11.09.1885 — 02.03.1930). Англ сирӹзӹ, поэт. Коклышы курымын сирӹшӹ кымдан пӓлӹмӹ авторвлӓ логӹц иктӹжӹ. Тӹдӹ романвлӓм, новеллывлӓм, лыдышвлӓм, драмывлӓм, эссевлӓм, корнышты каштмы шайыштмашвлӓм сирен. Тенгеок картинвлӓм рисуен, сӹлнӹшая критик ылын, сӓрӹзӹн пӓшӓм ӹштен. Лоренсӹн творчествыжы модернизм эстетикы доно кӹлдӓлтӹн. Тӹдӹн пӓшӓвлӓштӹжӹ эдемӹм шотеш пиштӹмӓш, эдемӹн ӓкшӹ, яратымаш, ӹлӹмӓшӹн ядмашвлӓ, секс кымда вӓрӹм йӓшнӓт. Автор Фрейд дон Ницшен философи дон эстетикыштым шотеш пиштен. Ӹшке жепӹнжӹ Лоренӹн сӹлнӹшая пӓшавлӓжӹ вӹкӹ кыце пурын, тенгеок тӹрынят анжышывлӓ ылыныт, лӹмӹнок мораль верц шалгышы чиновниквлӓ тӹдӹм пынзыныт. Тидӹ гишӓнӓт, ӓнят, сирӹзӹ шукыжымок Кого Британиштӹ агыл, вес сӓндӓлӹквлӓштӹ ӹлен. Кыды пӓшӓжӹм Англиштӹ публикуяшыжат йӧн ылде, лӹмӹнок секс темывлӓ доно кӹлдӓлтшӹвлӓм. Лоренсӹн пӓшӓвлӓжӹ доно, шанем, кырык марла лыдшы пӓлӹмӹ агыл. Тиштӹ кыды-тидӹ лыдышыжым туан йӹмӹлӓнӓ лыдаш лиэш. Пӓлдӹртӹде ак ли, Лоренс англ поэтвлӓ логӹц пӹтӓришӹ ылеш, кыды рифмывлӓм, воксьокат, манаш лиэш, ӧрдӹжеш коден.
Эдемӹн портретшӹ
Man`s Image
Ӹжӓл, эдем тӹгӹрӹш ӹшке вӹкӹжӹ анжымы годым
пи гань шӹдӹн опталтен ак колты
ӓль коти гань шӹдешкен, ӱпшӹм шагалтен ак шӹндӹ!
Ӹжӓл, тӹдӹ ӹшкӹмжӹн косир ылмыжым веле ужеш,
суксывлӓ (антьылвлӓ) гӹц изиш изиэшрӓк ӹшкӹмжӹм шотлен!
Дӓ тидӹжӹ гӹнь, потикӓлӓ каеш!
Моральдымы ылмаш
Immorality
Лачокат моральдымы ылмаш, кыце мӹнь ынгылем —
кынам ӹшкӹмӹм ӓль тӓгӱм весӹм
тидӹм ӹштӹмет ак шо гӹнят
моральдымым ӹштӓш шӱдет.
Ӹлӹмӓшӹн шӱлӹшӹжӹ
The Breath of Life
Ӹлӹмӓшӹн шӱлӹшӹжӹ дон вашталтмашвлӓн шӹдӹ мардежвлӓжӹ
икань ылыт.
Тӹ эдевмлӓ, кыдывлӓ йӹрвӓш ылышы вашталтмашвлӓ гӹц
кенвац кодыныт,
вашталтмашвлӓн мардежвлӓн лыпшымыштыт шижӹт дӓ
ӹлӹмӓшӹн шӱлӹшӹжӹ нигынамат нӹнӹ докы мӹнгеш ак тол
манын шанат.
Колышы эдемвлӓ
Dead People
Кынам эдемвлӓлӓн шӱлӓш волям ат пу,
нӹнӹ ӹлӹмӓшӹм ужын ак кердеп дӓ лач радиом веле колыштыт.
Кынам эдемвлӓлӓн шӱлӓш волям ат пу,
нӹнӹ вес эдемӹн цӓшӓн ылмыжым ужын ак кердеп
ӹшке кӧргӹштӹштӹ весӹ вӹкӹ шӹдӹм урден
ӹлӹшӹ эдемӹн сӹнзӓжӹмӓт вӓк чӹнген лыкташ йӓмдӹ ылшы
кӱшнӹлӓ чонгештӹлшӹ курныж гань
юкын сӹгӹрӓл колтен кердӹт.
Феникс
Phoenix
Тӹньӹм шин пумым, мырыктен колтымым, мондымым
дӓ ӓкдӹмеш кодымым вычет ма?
Ӓкдӹмеш тӹньӹм кодымым вычет ма?
курымеш мондымым?
Тенге ӹштӹмӹ ваштареш ылат гӹнь,
курымат ат вашталт.
Феникс тӹнӓм веле угӹц ӹлӹжеш,
кынам тӹдӹм йылатат, ӹлӹшӹнек йылатат, ломыжыш,
шокшы дӓ керӓл агыл пыракыш сӓртӓт.
Лач тидӹ паштек веле пӹжӓшӹштӹ тама у тӓрвӓнен кеӓ,
мамык гань пышкыды, чонгештен кеӓш йӓмдӹ ломыж
курныж гань цаткыды
колыдымы кекӹн угӹц
шачмыжы гишӓн пӓлӹкӹм пуа.
Йыд
Night
Кӹзӹт кынам йыд
тамаат у лиӓлтеш, сӹнзӓвлӓ питӹргӓт
вольыквлӓ рок вӹкӹ нӹжгӓн вазыт, амалаш.
Но эдемӹн кӓпшӹлӓн элтӓлӹмӓш келеш
вес эдемӹн ылмыжым сагажы шишнежӹ,
питӹрӹмӹ сӹнзӓжӹ доно тӹдӹм элтӓлӹнежӹ.
Ӹлӹмӓш верц кредӓлмӓш
Battle of Life
Ӹлӹмӓш со ваштареш ылмаш, тенге кужын шыпшылтеш?
Седӹ, шыпшылтеш. Мӹнь со кредӓлӓм.
Кредӓлде ак ли.
Тенге гӹнят кредӓлмӓш мӹньӹм когонжат ак интересуйы,
ак интересуеп соредӓлмӓшвлӓ, вырседӹлмӓшвлӓ, но
ак шо гӹнят тидӹм ӹштӓш вӓрештеш.
Ваштылмаш
Laughter
Колыштда кыце эдемвлӓ ваштылыт,
тенге махань нӹнӹ алталышывлӓ
ӓль трусвлӓ ылыт, колыда.
Цӓрнӹдӓ
Stop It
Шонгывлӓ иктӹм нмгынамат ынгылен ак кердеп-
вашталтмашвлӓм ат цӓрӹ.
Цилӓ йога, шонгывлӓӓт йӹле йоген кеӓт.
Сӓмӹрӹквлӓлӓн кого вашталтмашвлӓн ясыштышты
йогаш вӓрештеш.
Юл ылмаш
Courage
Кынам эдемвлӓ алталымаш доно согласуялтыт,
нӹнӹн йӓнгӹштӹштӹштӹ вӓрӹштӹ ак ли.
Эдемвлӓ лӱддӹмӹвлӓ, юлавлӓ ылыт ылгецӹ,
ӹшкӹмӹштӹм алталаш волям ак пуэп ыльы
ынгылен, пӓлен нӓлӹн, мам шижмӹштӹм келесен
шанымыштым ӹштӓт ыльы
шижмӹштӹ, тырхымышты паштек лач сек керӓлжӹм веле
ӹшкӹлӓнӹштӹ кодат ыльы,
нӹнӹ эртӹш шӹжӹшӹ пӱкшвлӓ гань лит ыльы,
цаткыдывлӓ дӓ яжовлӓ.
Сӓмӹрӹквлӓ шонгывлӓ сага,
тенге кыце шӹргӹштӹ пӹркемвлӓ кушкыт,
ӹлӹмӓшӹштӹн поспейӹшӹ пӱкшвлӓм погат.
Кӹзӹт ӹнде шонгывлӓлӓнжӹ лач кыпаш тӹнгӓлшӹ
кошкен кешӹ дӓ качы пӱкшвлӓ веле вӓрештӹт.
Эдемвлӓ худавлӓ агылеп ылнежӹ
Men Are Not Bade
Эдемвлӓ худвлӓ агылеп ылнежӹ, ирӹкӓн ылыт ылгецӹ.
Тюрьмӓштӹш гань ӹлӹмӓш нӹнӹм худам ӹштӓ,
эчежӹ окса паштек вуйым ямден кыргыжталмаш.
Эдемвлӓ ирӹкӓн ылыт ылгецӹ, ӹшке пӓшӓштӹ верц
ситӓлык пӓшӓдӓрӹм нӓлӹн, тӹнӓм
мӱлӓндӹ вӹлнӹш ӹлӹмӓшӓт яжорак лиэш ыльы,
эдемвлӓ пӓшӓштӹмӓт сусунрак ӹштӓт ыльы.
Эдемӹн ӹштӹмӹ хӓдӹрвлӓжӹ
Things Men Have Made
Хӓдырвлӓ, кыдывлӓм эдемвлӓ шытыр кидӹштӹ доно ӹштенӹт,
ӹшке ӹлӹмӓшӹштӹм ӹлӓш тӹнгӓлӹт,
ивлӓ вашт ӹлен лӓктӹн
курымеш ӹшке шӱлӹшӹштӹм кодат.
Седӹндоно хӓдӹрӹм ӹштӹшӹн колымыжы паштекӓт
нӹнӹ тӹдӹн гишӓн шокшын ӓшӹндӓрӹктӓт.
У ваштырвлӓ
New Brooms
У ваштырвлӓ яжон ӹштӹлӹт,
но ӹштӹлмӹ годым техень пырак арам кузыктат,
ӹштӹлшӹжӓт вӓк шӱлӓлтен колтен кердеш.
Валери Микор сӓрен
Цикмӓ 